IPL 2022: గుజరాత్‌ టైటాన్స్‌కి షాకిచ్చిన జేసన్‌ రాయ్‌.. ఇలా చేయడం రెండోసారి..!

ఇంటర్నెట్‌డెస్క్‌: ఇంగ్లాండ్‌ ఓపెనర్‌ జేసన్‌ రాయ్‌ ఐపీఎల్‌ కొత్త ఫ్రాంఛైజీ గుజరాత్‌ టైటాన్స్‌కు షాకిచ్చాడు. ఈనెల 26 నుంచి ప్రారంభమయ్యే మెగా టోర్నీ నుంచి అతడు తప్పుకొంటున్నట్లు సమాచారం. ఈ మేరకు గతవారమే ఆ ఫ్రాంఛైజీకి విషయం చెప్పాడని తెలిసింది. అయితే, అతడి స్థానంలో ఇంకా ఆ జట్టు మరెవరినీ ఎంపిక చేసుకోకపోవడం గమనార్హం. ఇక గతనెల జరిగిన మెగా వేలంలో గుజరాత్‌ యాజమాన్యం అతడిని కనీస ధర రూ.2కోట్లకు కొనుగోలు చేసిన సంగతి తెలిసిందే. దీంతో రాబోయే మెగా టోర్నీలో రాయ్‌ ఆ జట్టు తరఫున ఓపెనర్‌గా బరిలోకి దిగుతాడని అంతా భావించారు. కానీ, ఇప్పుడు తప్పుకోవడం గమనార్హం. రెండు నెలల పాటు జరిగే ఐపీఎల్‌లో అంతకాలం బయోబబుల్‌లో గడపడం కష్టమని భావించి ఈ నిర్ణయం తీసుకున్నట్లు తెలుస్తోంది.

కాగా, జేసన్‌ రాయ్‌ ఐపీఎల్‌లో ఇలా చేయడం ఇది రెండోసారి. 2020 సీజన్‌లోనూ దిల్లీ క్యాపిటల్స్‌ వేలంలో రూ.1.5 కోట్ల కనీస ధరకు అతడిని కొనుగోలు చేసింది. అయితే, తర్వాత అతడు వ్యక్తిగత కారణాలతో ఆ టోర్నీ నుంచి నిష్క్రమించాడు. ఇక రాయ్‌.. 2017లో గుజరాత్‌ లైయన్స్‌, 2018లో దిల్లీ డేర్‌డెవిల్స్‌, 2021లో సన్‌రైజర్స్‌ హైదరాబాద్‌ జట్ల తరఫున ఆడిన సంగతి తెలిసిందే. కానీ, పెద్దగా ఆకట్టుకోలేకపోయాడు. మరోవైపు ఇటీవలే ముగిసిన పాకిస్థాన్‌ సూపర్‌ లీగ్‌లో ఈ ఇంగ్లాండ్‌ ఓపెనర్‌ 50.50 సగటుతో 303 పరుగులు చేసి అదరగొట్టాడు. అందులో ఒక శతకంతో పాటు రెండు అర్ధ శతకాలు సాధించడం విశేషం.