Jos Buttler : బట్లర్‌కు జరిమానా.. మ్యాచ్‌ ఫీజులో 10 శాతం కోత

జైపుర్‌ : కోల్‌కతాతో జరిగిన మ్యాచ్‌లో రాజస్థాన్‌ రాయల్స్‌ తొమ్మిది వికెట్ల తేడాతో అద్భుత విజయాన్ని నమోదు చేసిన విషయం తెలిసిందే. అయితే, ఈ మ్యాచ్‌లో రాజస్థాన్‌ ఓపెనర్‌ జోస్‌ బట్లర్‌కు ఐపీఎల్‌ జరిమానా విధించింది. ‘ఐపీఎల్‌ ప్రవర్తనా నియమావళిని ఉల్లంఘించినందుకు బట్లర్‌కు మ్యాచ్‌ ఫీజులో 10 శాతం కోత విధిస్తున్నాం. ఐపీఎల్‌ కోడ్‌ ఆఫ్‌ కండక్ట్‌ ఆర్టికల్‌ 2.2 కింద లెవెల్‌ 1 స్థాయి ఉల్లంఘనకు అతడు పాల్పడ్డాడు. ఇందులో మ్యాచ్‌ రెఫరీ నిర్ణయమే అంతిమం’ అని ఐపీఎల్‌ ఓ ప్రకటనలో పేర్కొంది. 

అయితే బట్లర్‌ దుష్ప్రవర్తన గురించి ఇందులో స్పష్టంగా పేర్కొననప్పటికీ.. రనౌట్‌ అయిన సమయంలో అతడి వ్యవహారశైలి కారణంగానే జరిమానా విధించినట్లు తెలుస్తోంది.  బట్లర్‌ రెండో ఓవర్‌ నాలుగో బంతికే రనౌట్‌ రూపంలో పరుగులేమీ చేయకుండా వెనుదిరిగిన విషయం తెలిసిందే.