R Ashwin : సరిపడా అవకాశాలు రాకున్నా.. అశ్విన్‌ సాధించేశాడు : కపిల్ దేవ్‌

ఇంటర్నెట్ డెస్క్‌ : టీమిండియా సీనియర్‌ స్పిన్నర్‌ రవిచంద్రన్‌ అశ్విన్‌పై క్రికెట్ దిగ్గజం కపిల్ దేవ్‌ ప్రశంసలు కురిపించాడు. టెస్టుల్లో తన పేరిట ఉన్న రికార్డును అధిగమించడం పట్ల సంతోషం వ్యక్తం చేశాడు. ఇటీవల కాలంలో సరిపడ అవకాశాలు రాకున్న అశ్విన్‌ గొప్ప ఘనత సాధించాడని పేర్కొన్నాడు.

‘అంతర్జాతీయ టెస్టు క్రికెట్లో ఇటీవల సరిపడా అవకాశాలు రాకున్నా అశ్విన్ గొప్ప ఘనత సాధించాడు. అవకాశమిచ్చినప్పుడల్లా సత్తా చాటుతూ చాలా త్వరగా నా పేరిట ఉన్న (434 వికెట్లు) రికార్డును అధిగమించాడు. అతడు సాధించిన ఘనత పట్ల చాలా సంతోషంగా ఉంది. నా కెరీర్‌ ముగిసిపోయింది. ఇంకెంత కాలం ఆ రికార్డు నా పేరిట కొనసాగాలి.? అశ్విన్ అద్బుతమైన క్రికెటర్‌. చాలా తెలివైన స్పిన్నర్‌. ప్రస్తుతం అతడి లక్ష్యం టెస్టుల్లో ఐదొందల వికెట్లు పడగొట్టడమే. కానీ, అతడు అంతకంటే ఎక్కువ వికెట్లు పడగొట్టగలడనే నమ్మకం నాకుంది’ అని కపిల్ దేవ్ పేర్కొన్నాడు. శ్రీలంకతో జరిగిన తొలి టెస్టు మ్యాచులో ఆరు వికెట్లు పడగొట్టిన రవిచంద్రన్‌ అశ్విన్‌.. టెస్టుల్లో కపిల్ దేవ్‌ పేరిట ఉన్న 434 వికెట్ల రికార్డును బద్దలు కొట్టాడు. తద్వారా భారత్‌ తరఫున టెస్టుల్లో అత్యధిక వికెట్లు తీసిన రెండో బౌలర్‌గా ఘనత సాధించాడు. మాజీ స్పిన్ దిగ్గజం అనిల్ కుంబ్లే (619 వికెట్లు) అశ్విన్‌ కంటే ముందున్నాడు. కపిల్ దేవ్ మూడో స్థానంలో కొనసాగుతున్నాడు.  

‘28 ఏళ్ల క్రితం.. కపిల్ దేవ్ 434 వికెట్లతో రికార్డు సృష్టించినప్పుడు నేను చాలా సంతోషించాను. అయితే, నేను ఆఫ్ స్పిన్నర్‌ అవుతానని గానీ, భారత్‌ తరఫున ఆడతానని గానీ ఎప్పుడూ అనుకోలేదు. అన్నింటికి మించి కపిల్ దేవ్‌ రికార్డును అధిగమిస్తాననే ఆలోచన కూడా నాకెప్పుడూ రాలేదు. ఇప్పటి వరకు క్రికెట్‌ నాకు చాలా ఇచ్చింది. అందుకు నేను కృతజ్ఞుడను’ అని అశ్విన్ పేర్కొన్నాడు.