IND vs PAK: భారత్‌-పాక్‌ మ్యాచ్‌.. అప్పుడు వస్తుంది అసలైన ఒత్తిడి : కపిల్‌ దేవ్‌

ఇంటర్నెట్‌ డెస్క్‌ : చిరకాల ప్రత్యర్థులైన భారత్‌-పాకిస్థాన్‌(IND vs PAK) మధ్య మ్యాచ్‌ అంటే.. ఇరు దేశాలతోపాటు ప్రపంచవ్యాప్తంగా ఉన్న క్రీడాభిమానులూ ఎంతో ఆసక్తిగా ఎదురుచూస్తారన్న విషయం తెలిసిందే. త్వరలో జరిగే ఆసియా కప్‌.. ఆ తర్వాత జరిగే వన్డే ప్రపంచకప్‌ వేదికగా దాయాదుల మధ్య మ్యాచ్‌లు జరగనున్నాయి. దీంతో ఇప్పటి నుంచే ఈ మ్యాచ్‌లపై పలువురు విశ్లేషణలు ప్రారంభించారు. ఇరు జట్లకు ఎంతో  ప్రతిష్ఠాత్మకంగా మారే ఈ మ్యాచ్‌లపై మాజీ దిగ్గజం కపిల్‌దేవ్‌(Kapil Dev) కూడా స్పందించాడు. భారత్‌-పాక్‌ మ్యాచ్‌ అంటే.. అసలు ఒత్తిడి ఎక్కడి నుంచి వస్తుందో తెలిపాడు.

భారత్‌-పాక్‌ మధ్య మ్యాచ్‌ వెంటే అనేక పరిణామాలు చోటుచేసుకుంటాయి.. ఇవన్నీ ఒత్తిడికి దారితీస్తాయా? అని ఓ ఇంటర్వూలో కపిల్‌కు ప్రశ్న ఎదురైంది. దీనిపై ఈ దిగ్గజం స్పందిస్తూ.. ఆన్‌ఫీల్డ్‌ నుంచి ఒత్తిడి ఎదురుకాదని చెప్పాడు.

మీకు టీమ్‌ ఇండియా కంటే ఐపీఎల్‌ ముఖ్యమా..?

‘‘ఒత్తిడి అంటే ఏంటి? ఓ బంతిని ఎదుర్కొన్నప్పుడు మీరు ఒత్తిడికి గురికారు. కానీ.. మీరు కాఫీ ఆర్డర్‌ చేసినప్పుడు.. మీకు కాఫీ అందిస్తూ వెయిటర్‌ ‘పాకిస్థాన్‌పై అస్సలు ఓడిపోకూడదు’ అంటుంటే.. అప్పుడు వస్తుంది అసలైన ఒత్తిడి. ఆ తర్వాత అది పెరగడం ప్రారంభమవుతుంది’’ అని కపిల్‌ (Kapil Dev) వివరించాడు.

ఇక తన తరానికి చెందిన ఏ పాకిస్థాన్‌ క్రికెటర్‌తోనైనా స్నేహాన్ని కొనసాగిస్తున్నారా? అని ప్రశ్నించినప్పుడు.. ఈ రోజుల్లో ఎవరికీ సమయం లేదని చెప్పాడు. ‘నేను నా జట్టు సభ్యులను కలవను. ఎందుకంటే నా సొంత పనుల్లో నేను బిజీగా ఉంటాను కాబట్టి. అలాగే.. పాక్‌కు ప్రధానిగా పనిచేసిన ఇమ్రాన్‌ను నేను ఎలా కలవగలను’ అని కపిల్‌ ప్రశ్నించాడు.

ఇక ఈ 1983 ప్రపంచకప్‌ హీరో.. ప్రస్తుత టీమ్‌ఇండియా(Team India) సీనియర్‌ ఆటగాళ్ల తీరుపై విమర్శలు చేస్తున్న విషయం తెలిసిందే.