KL Rahul: వాహ్‌ రాహుల్‌..! గేల్‌, వార్నర్‌ను వెనక్కినెట్టి.. నాలుగో సారి 600

ఇంటర్నెట్‌డెస్క్‌: టీమ్‌ఇండియా టాప్‌ ఆర్డర్‌ బ్యాట్స్‌మన్‌, లఖ్‌నవూ కెప్టెన్‌ కేఎల్ రాహుల్ భారత టీ20 లీగ్‌లో అరుదైన ఘనత సాధించాడు. ఈ టోర్నీలో మొత్తం మీద నాలుగు సార్లు 600 లేదా అంతకన్నా ఎక్కువ పరుగులు సాధించిన ఏకైక బ్యాట్స్‌మన్‌గా నిలిచాడు. గతరాత్రి బెంగళూరుతో తలపడిన కీలకమైన ఎలిమినేటర్‌ మ్యాచ్‌లో రాహుల్‌ (79; 58 బంతుల్లో 3x4, 5x6) ధనాధన్‌ బ్యాటింగ్‌ చేసిన సంగతి తెలిసిందే. ఈ మ్యాచ్‌లో లఖ్‌నవూ ఓటమిపాలైనా అతడు తీవ్రంగా పోరాడాడు. ఈ క్రమంలోనే ఈ సీజన్‌లో నాలుగో అర్ధ శతకం సాధించడం ద్వారా మొత్తం 616 పరుగులు పూర్తి చేసుకున్నాడు. దీంతో వరుసగా మూడేళ్లు 600 కన్నా అధిక పరుగులు సాధించిన ఆటగాడిగా నిలిచాడు.

ఇంతకుముందు పంజాబ్‌ కెప్టెన్‌గా ఉన్న రాహుల్‌ గతేడాది 2021 సీజన్‌లో 13 మ్యాచ్‌ల్లో 626 పరుగులు చేశాడు. దీంతో ఆ సీజన్‌లో టాప్‌-3 బ్యాట్స్‌మన్‌గా నిలిచాడు. అలాగే 2020 సీజన్‌లో 14 మ్యాచ్‌ల్లో 670 పరుగులు చేశాడు. అప్పుడు అగ్రస్థానం కైవసం చేసుకున్నాడు. ఇక 2019లో 13 మ్యాచ్‌ల్లో 593 పరుగులు చేసి టాప్‌-2లో ఉన్నాడు. అంతకుముందు 2018 సీజన్‌లో 14 మ్యాచ్‌ల్లో 659 పరుగులతో మూడో స్థానంతో సరిపెట్టుకొన్నాడు. ఈ జాబితాలో వెస్టిండీస్‌ బ్యాట్స్‌మన్‌ క్రిస్‌గేల్‌ 2011, 2012, 2013 సీజన్లలో వరుసగా మూడేళ్లు బెంగళూరు తరఫున 600కి పైగా పరుగులు చేసిన బ్యాట్స్‌మన్‌గా నిలిచాడు. అలాగే ఆసీస్‌ బ్యాట్స్‌మన్‌ డేవిడ్‌ వార్నర్‌ 2016, 2018, 2019 సీజన్లలో హైదరాబాద్‌ తరఫున అదే ఘనత సాధించాడు. దీంతో రాహుల్‌ ఈసారి వారిద్దర్నీ వెనక్కినెట్టి నాలుగో సారి 600కుపైగా పరుగులు సాధించాడు.