Lakshya Sen: స్వర్ణం సాధించిన లక్ష్యసేన్‌‌.. తుదిపోరులో విజయం

బర్మింగ్‌హామ్‌: కామన్వెల్త్‌ క్రీడల్లో పురుషుల బ్యాడ్మింటన్‌ సింగిల్స్‌ విభాగంలో భారత షట్లర్‌ లక్ష్యసేన్‌ విజయం సాధించాడు. దీంతో అతడు స్వర్ణంతో మెరిశాడు. మలేషియాకు చెందిన జె యంగ్‌ ఎన్జీతో తలపడిన ఫైనల్స్‌లో లక్ష్యసేన్‌ 19-21, 21-9, 21-16 తేడాతో గెలుపొందాడు. తొలి గేమ్‌లో కాస్త వెనుకంజలో నిలిచిన లక్ష్యసేన్‌ చివరి రెండు గేమ్స్‌లోనూ పట్టుదలగా ఆడాడు. ప్రత్యర్థి గట్టి పోటీనిచ్చినా ఎక్కడా ఆత్మవిశ్వాసం కోల్పోలేదు. దీంతో గొప్పగా పోరాడి భారత్‌కు మరో పసిడి అందించాడు. ఈ విజయంతో కామన్వెల్త్‌ క్రీడల్లో భారత్‌ మొత్తం 57 పతకాలు సాధించింది. అందులో 20 స్వర్ణాలు, 15 రజతాలు, 22 కాంస్య పతకాలు ఉన్నాయి. అంతకుముందు మహిళల సింగిల్స్‌ విభాగంలో పీవీ సింధు విజేతగా నిలిచిన సంగతి తెలిసిందే.