GGT vs MIW: హాఫ్‌ సెంచరీతో రాణించిన హర్మన్‌ప్రీత్‌.. గుజరాత్‌ ముందు భారీ లక్ష్యం

ముంబయి: మహిళల ప్రీమియర్‌ లీగ్‌ (WPL) తొలి మ్యాచ్‌లో భాగంగా గుజరాత్‌తో తలపడుతున్న ముంబయి ఇన్నింగ్స్‌ పూర్తయింది. తొలుత టాస్‌ ఓడి బ్యాటింగ్‌కు దిగిన హర్మన్‌ప్రీత్‌ సేన నిర్ణీత 20 ఓవర్లు ముగిసేసరికి 5 వికెట్లు కోల్పోయి 207 పరుగులు చేసింది. బ్యాటింగ్‌లో హర్మన్‌ (65) హాఫ్‌ సెంచరీతో ఆకట్టుకోగా.. మాథ్యూస్‌ (47), అమిలియా (45*) కూడా రాణించారు. గుజరాత్‌ బౌలర్లలో స్నేహ్‌రాణా రెండు వికెట్లు పడగొట్టగా.. గార్డ్‌నర్‌, తనుజా, జార్జియా తలో వికెట్‌ తీశారు.

అదరగొట్టిన హర్మన్‌..

ఓపెనర్‌ హేలీ మాథ్యూస్‌ (47) జట్టుకి మంచి ఆరంభాన్ని ఇచ్చింది. మరో ఓపెనర్‌ యాస్తికా భాటియా (1) నిరాశపరిచినా.. నిలకడగా ఆడుతూ స్కోరు బోర్డును పరుగులు పెట్టించింది. అనంతరం నాట్‌ సీవర్‌ (23) కలిసి ఇన్నింగ్స్‌ను చక్కదిద్దే ప్రయత్నం చేసింది. 9.6 ఓవర్లలో గార్డ్‌నర్‌ బౌలింగ్‌లో హాఫ్‌ సెంచరీకి చేరువలో 47 పరుగుల వద్ద బౌల్డ్‌ అయ్యింది. తర్వాత వచ్చిన కెప్టెన్‌ హర్మన్‌ (65) బౌలర్లపై విరుచుకుపడింది. కేవలం 26 బంతుల్లోనే 60 పరుగులు చేసింది. దీంతో డబ్ల్యూపీఎల్‌లో తన తొలి అర్ధశతకాన్ని నమోదు చేసుకుంది.