IPL 2022: ప్రపంచకప్‌ గెలిచినా.. వేలానికి అనర్హులేనా..?

(ఫొటో : బీసీసీఐ ట్విటర్‌ నుంచి)

ఇంటర్నెట్‌డెస్క్‌: ఇటీవల టీమ్‌ఇండియా అండర్‌-19 ప్రపంచకప్‌ గెలిచినా అందులోని చాలా మంది యువకులు రాబోయే మెగా వేలంలో పాల్గొనేందుకు వేచి చూడాల్సిన పరిస్థితి నెలకొంది. ఎందుకంటే అండర్-19 ఆటగాళ్లు ఐపీఎల్‌ వేలంలో పాల్గొనాలంటే బీసీసీఐ కొన్ని షరతులు విధించిన సంగతి తెలిసిందే. కచ్చితంగా దేశవాళీ క్రికెట్‌లో ఒక ఫస్ట్‌క్లాస్‌ మ్యాచ్‌ లేదా లిస్ట్‌-ఏ గేమ్‌ ఆడిన వారే అందుకు అర్హులు. ఒకవేళ దేశవాళీ క్రికెట్‌లో ఆడిన అనుభవం లేకపోతే.. వేలం జరిగే తేదీ నాటికి ఆయా క్రికెటర్లు 19 ఏళ్లు కలిగి ఉండాలి.

అయితే, ఇప్పుడు ప్రపంచకప్‌ గెలిచిన జట్టులో కనీసం 8 మంది ఆటగాళ్లు బీసీసీఐ పేర్కొన్న అర్హతలు సాధించలేకపోయారు. దీంతో ప్రపంచకప్‌ గెలవడంలో ముఖ్య భూమిక పోషించిన షేక్‌ రషీద్‌, దినేశ్‌ బానా, రవికుమార్‌, నిషాంత్‌ సింధు లాంటి కీలక ఆటగాళ్లు సైతం అవకాశం కోల్పోయే పరిస్థితి తలెత్తింది. మరోవైపు ఈ విషయంపై బీసీసీఐ త్వరలోనే సానుకూలంగా నిర్ణయం తీసుకునే అవకాశం ఉందని బోర్డు వర్గాలు అభిప్రాయపడుతున్నాయి. కొంతకాలంగా కరోనా మహమ్మారి వల్ల దేశవాళీ క్రికెట్‌ మ్యాచ్‌లు జరగకపోవడమే అందుకు కారణమని వాళ్లు చెప్పారు. మరోవైపు ఈనెల 17 నుంచి ఈ సీజన్‌ రంజీ ట్రోఫీ మొదలవుతుండటంతో ఆయా రాష్ట్ర సంఘాలు తమ ఆటగాళ్లను ఎంపిక చేసినా అవకాశం ఉండదు. ఎందుకంటే మెగా వేలం 12, 13 తేదీల్లోనే నిర్వహిస్తున్నారు. ఇక ఈ మెగా వేలంలో మొత్తం 590 మంది క్రికెటర్లు తమ అదృష్టాన్ని పరీక్షించుకుంటుండగా.. అందులో 228 మంది అంతర్జాతీయ ఆటగాళ్లు..  మరో 355 మంది యువకులు ఉన్నారు. మరో ఏడుగురు అసోసియేట్‌ దేశాల క్రికెటర్లూ ఉన్నారు.