MS Dhoni:బర్త్‌ డే పార్టీలో క్రికెటర్లతో కలిసి డ్యాన్స్‌ చేసిన ధోనీ.. వీడియోలు వైరల్

ఇంటర్నెట్ డెస్క్: టీమ్‌ఇండియా మాజీ కెప్టెన్‌ మహేంద్రసింగ్‌ ధోనీ అంతర్జాతీయ క్రికెట్‌కు రిటర్మెంట్ ప్రకటించిన తర్వాత కుటుంబసభ్యులు, స్నేహితులతో ఎక్కువ సమయం గడుపుతున్నాడు. అప్పుడప్పుడు వెకేషన్స్‌కి కూడా వెళ్తూ సేదతీరుతున్నాడు. తాజాగా ధోనీ బర్త్‌ డే పార్టీలో సందడి చేశాడు. దుబాయ్‌లో తన స్నేహితుడి పుట్టిన రోజు వేడుకకు హాజరైన ధోనీ.. టీమ్‌ఇండియా క్రికెటర్లు హార్దిక్‌ పాండ్య, కృనాల్ పాండ్య, ఇషాన్‌ కిషన్‌లతో కలిసి డ్యాన్స్‌ చేశాడు. ఈ బర్త్‌ డే పార్టీకి నలుపు రంగు సూట్‌, తెల్లటి చొక్కా ధరించి స్టైలిష్‌ లుక్‌లో కనిపించాడు. ప్రముఖ ర్యాపర్‌ బాద్‌షా పాటలు పాడుతుంటే ఇషాన్‌ కిషన్‌, హార్దిక్ పాండ్య, కృనాల్ పాండ్యతో కలిసి ధోనీ అదిరిపోయే స్టెప్పులేశాడు. ఇందుకు సంబంధించిన వీడియోలను ధోనీ సతీమణి సాక్షిసింగ్ తన ఇన్‌స్టాగ్రామ్‌ స్టోరీస్‌లో పోస్ట్‌ చేశారు. ఈ వీడియోలు ప్రస్తుతం సోషల్ మీడియాలో వైరల్‌గా మారాయి.   

న్యూజిలాండ్‌తో మూడు టీ20 సిరీస్‌కు సారథ్యం వహించిన హార్దిక్‌ పాండ్యని, ఈ సిరీస్‌లో ఓపెనర్‌గా బరిలోకి దిగిన ఇషాన్‌ కిషన్‌ని ప్రస్తుతం కివీస్‌తో జరుగుతున్న వన్డే సిరీస్‌కు ఎంపిక చేయలేదు. దీంతో ఈ ఇద్దరూ క్రికెటర్లు నేరుగా దుబాయ్ చేరుకున్నట్లు తెలుస్తోంది. ఈ క్రమంలోనే ధోనీ స్నేహితుడి బర్త్‌ డే పార్టీకి హాజరయ్యారని అభిమానులు భావిస్తున్నారు.