Fifa worldcup 2022: ఫిఫా ప్రపంచకప్‌లో ధోనీ క్రేజ్‌.. చెన్నై జెర్సీతో బ్రెజిల్‌కు మద్దతు

దోహా: ఫిఫా ప్రపంచకప్‌లో భాగంగా సెర్బియాపై బ్రెజిల్‌ 2-0 తేడాతో ఘన విజయాన్ని నమోదు చేసింది. తన అద్భుతమైన ప్రదర్శనతో ఆకట్టుకొన్న బ్రెజిల్‌ ఆటగాడు రిచర్లీసన్‌ జట్టును విజయం వైపుగా నడిపించాడు. ఈ నేపథ్యంలో గురువారం దోహా స్టేడియంలో టీమ్ఇండియా మిస్టర్‌ కూల్‌ మహేంద్రసింగ్‌ ధోనీ అభిమానుల సందడి కనిపించింది. స్టాండ్స్‌లో ఉన్న ఓ భారతీయ అభిమాని చెన్నై జెర్సీతో మ్యాచ్‌కు హాజరయ్యాడు. ఈ మ్యాచ్‌లో  గెలుపునకు తోటి ప్రేక్షకులతో కలిసి సంబరాలు చేసుకున్నాడు. ఈ సందర్భంగా ఓ బ్రెజిల్‌ అభిమానితో కలిసి ఫొటోలకు ఫోజులిచ్చాడు. ఆ సమయంలో ధోనీ పేరుతో ఉన్న జెర్సీని చూపుతూ తన అభిమానాన్ని చాటుకున్నాడు. వీటిని చెన్నై జట్టు ట్విటర్‌లో పంచుకోవడంతో వైరల్‌గా మారాయి. ఈ పోస్ట్‌ ధోనీ అభిమానులను విపరీతంగా ఆకట్టుకుంటోంది. సెర్బియాపై విజయం అనంతరం స్విట్జర్లాండ్‌ను ఈ జట్టు ఢీకొట్టనుంది.