Dhoni: పాక్ పేసర్‌కు ధోనీ గిఫ్ట్‌.. అదేంటోతెలుసా..?

ఇంటర్నెట్‌డెస్క్‌: టీమ్‌ఇండియా మాజీ సారథి మహేంద్రసింగ్‌ ధోనీ మాటిస్తే కచ్చితంగా నిలబెట్టుకుంటాడని చెన్నై సూపర్‌ కింగ్స్‌ టీమ్‌ మేనేజర్‌ రసెల్‌ రాధాకృష్ణన్‌ అన్నారు. తాజాగా మహీ.. పాకిస్థాన్‌ పేసర్‌ రావుఫ్‌కు ఓ అద్భుతమైన బహుమతి ఇచ్చాడు. దీంతో అతడు సంతోషంలో మునిగిపోయాడు. ఈ విషయాన్ని రావుఫ్‌ స్వయంగా ట్విటర్‌ ద్వారా అభిమానులతో పంచుకొని సంతోషం వ్యక్తం చేశాడు.

ధోనీ తన ఏడో నంబర్‌ సీఎస్కే జెర్సీని కానుకగా ఇచ్చాడని చెప్పాడు. తన వ్యక్తిత్వం, గుడ్‌విల్‌తో ఆ జెర్సీ ఇంకా అభిమానుల మన్ననలు పొందుతోందని పాక్‌ పేసర్ అన్నాడు. అలాగే తనకు ఈ గిఫ్ట్‌ అందడంలో సహకరించిన సీఎస్కే జట్టు మేనేజర్ రసెల్‌కు ప్రత్యేక ధన్యవాదాలు చెప్పాడు. ఈ నేపథ్యంలోనే రసెల్‌ రీట్వీట్‌ చేస్తూ ధోనీ మాటిస్తే నిలబెట్టుకుంటాడన్నాడు.

ఈ పాక్‌ పేసర్‌కు ధోనీ అంటే విపరీతమైన ఇష్టం. ధోనీతో కలిసి ఆడే అవకాశం రాకపోయినా రావుఫ్ ఇటీవల ముగిసిన టీ20 ప్రపంచకప్ సందర్భంగా మహీని కలిశాడు. మ్యాచ్‌ అనంతరం ఇద్దరూ కాసేపు ముచ్చటించుకున్నారు కూడా. ఈ నేపథ్యంలోనే తాజాగా ధోనీ అతడికి తన జెర్సీని బహుమతిగా పంపించి సంతోష పరిచాడు.