WPL: ముంబయి జైత్రయాత్ర.. వరుసగా ఐదో విజయం

ముంబయి: డబ్ల్యూపీఎల్‌(WPL)లో ముంబయి ఇండియన్స్‌(MIW) జైత్రయాత్ర కొనసాగుతోంది. ఓటమన్నదే ఎరుగకుండా ముందుకు సాగుతోంది. ముంబయి వేదికగా జరిగిన పోరులో గుజరాత్‌ జెయింట్స్‌(GGW)ను 55 పరుగుల తేడాతో చిత్తు చేసింది. ముంబయి నిర్దేశించిన 163 పరుగుల లక్ష్యాన్ని గుజరాత్‌ జట్టు ఛేదించలేకపోయింది. ఆ జట్టు 20 ఓవర్లలో 9 వికెట్లు కోల్పోయి 107 పరుగులే చేసింది. ఈ గెలుపుతో ముంబయి జట్టు వరుసగా ఐదో విజయాన్ని తన ఖాతాలో వేసుకుని అగ్రస్థానంలో కొనసాగుతోంది. ముంబయి బౌలర్లలో నాట్‌ సీవర్‌ బ్రంట్‌, హేలీ మాథ్యూస్‌ చెరో మూడు వికెట్లు తీసి గుజరాత్‌ పతనాన్ని శాసించారు. అమేలియా కెర్‌ రెండు వికెట్లు తీయగా, వాంగ్‌ ఒక వికెట్‌ పడగొట్టింది. 

తొలుత టాస్‌ ఓడి బ్యాటింగ్‌ చేసిన ముంబయి నిర్ణీత 20 ఓవర్లలో 8 వికెట్ల నష్టానికి 162 పరుగులు చేసింది. కెప్టెన్‌ హర్మన్‌ ప్రీత్‌కౌర్‌ (51; 30 బంతుల్లో 7 ఫోర్లు, 2 సిక్స్‌లు) అర్ధసెంచరీతో వీరవిహారం చేసింది. యాస్తిక భాటియా (44; 37 బంతుల్లో 5 ఫోర్లు, 1 సిక్స్), నాట్ సీవర్ (36; 31 బంతుల్లో 5 ఫోర్లు, 1 సిక్స్‌) రాణించారు. అనంతరం 163 పరుగుల లక్ష్యంతో బరిలోకి దిగిన గుజరాత్‌ ఏ దశలోనూ విజయం వైపు అడుగులు వేయలేకపోయింది. ఆ జట్టు 57కే 6 కీలక వికెట్లు కోల్పోయి పీకల్లోతు కష్టాల్లో పడింది. ఆ జట్టులో కేవలం నలుగురు మాత్రమే రెండంకెల స్కోర్‌ను నమోదు చేశారు. మిగతావారు పూర్తిగా విఫలమయ్యారు. హర్లీన్‌ డియోల్‌ (22) టాప్‌ స్కోరర్‌.