ఆర్పీసింగ్‌ తర్వాత నటరాజన్‌

బ్రిస్బేన్‌: టీమ్‌ఇండియా యువ పేసర్‌ నటరాజన్‌ ఆస్ట్రేలియాతో జరుగుతున్న నాలుగో టెస్టులో కొత్త రికార్డు నమోదు చేశాడు. అరంగేట్ర టెస్టులో రెండో అత్యుత్తమ ప్రదర్శన (3/78) చేసిన భారత ఎడమచేతి వాటం పేసర్‌గా నిలిచాడు. అంతకుముందు ఆర్పీసింగ్‌ 2004-05 సీజన్‌లో పాకిస్థాన్‌ పర్యటన సందర్భంగా ఫైసలాబాద్‌ టెస్టులో (4/89) మెరుగైన ప్రదర్శన చేశాడు. ఇది టీమ్‌ఇండియా తరఫున లెఫ్టార్మ్‌ పేసర్లలో తొలి టెస్టులో అత్యుత్తమ ప్రదర్శనగా నిలిచింది. ఆ తర్వాత నటరాజన్‌ ప్రస్తుతం జరుగుతున్న గబ్బా టెస్టులో మూడు వికెట్లు తీసి రెండో స్థానంలో నిలిచాడు.

మరోవైపు ఈ తమిళనాడు పేసర్‌ తొలుత ఆస్ట్రేలియా పర్యటనకు నెట్‌బౌలర్‌గా ఎంపికయ్యాడు. ఐపీఎల్‌లో ఆకట్టుకోవడంతో టీమ్‌ఇండియా నుంచి పిలుపు వచ్చింది. అయితే, అనుకోకుండానే ఈ పర్యటనలో నటరాజన్‌ మూడు ఫార్మాట్లలో అరంగేట్రం చేశాడు. దీంతో భారత్‌ తరఫున ఈ రికార్డు సృష్టించిన తొలి ఆటగాడిగా రికార్డు నెలకొల్పాడు. అలాగే ప్రపంచ వ్యాప్తంగా 17వ ఆటగాడిగా నిలిచాడు. నటరాజన్‌కు తొలుత మూడో వన్డేలో అవకాశం రావడంతో రెండు వికెట్లు తీశాడు. ఆ ప్రదర్శనతో టీ20 జట్టులో అడుగుపెట్టాడు. అక్కడ 6 వికెట్లు తీయడంతో భారత్‌ సిరీస్‌ గెలవడంలో కీలక పాత్ర పోషించాడు. మరోవైపు టెస్టు సిరీస్‌లో టీమ్‌ఇండియా ప్రధాన పేసర్లంతా గాయపడడంతో నటరాజన్‌కు ఈ ఫార్మాట్‌లోనూ అవకాశం వచ్చింది. దీంతో నాలుగో టెస్టు తొలి ఇన్నింగ్స్‌లో మూడు వికెట్లు తీసి ఆకట్టుకున్నాడు. 

ఇవీ చదవండి..
పాండ్య సోదరులకు పితృ వియోగం..
రోహిత్‌ను సరదాగా ట్రోల్‌ చేసిన డీకే