Ruturaj Gaikwad: రుతురాజ్‌ తీరుపై నెటిజన్ల ఆగ్రహం.. ఎందుకో తెలుసా?

(Photo: Ruturaj Gaikwad Instagram)

బెంగళూరు: టీమ్‌ఇండియా యువ ఓపెనర్‌ రుతురాజ్‌ గైక్వాడ్‌పై నెటిజన్లు తీవ్ర ఆగ్రహం వ్యక్తం చేస్తున్నారు. గతరాత్రి బెంగళూరు వేదికగా దక్షిణాఫ్రికాతో జరిగిన మ్యాచ్‌లో అతడు వ్యవహరించిన తీరే అందుకు కారణం. వర్షం కారణంగా రద్దయిన ఈ పోరులో గైక్వాడ్.. మైదాన సిబ్బంది ఒకరితో వ్యవహరించిన తీరు వివాదాస్పదమైంది. చిన్నస్వామి స్టేడియంలోనూ టాస్‌ ఓడి తొలుత బ్యాటింగ్‌ చేసిన టీమ్‌ఇండియా 3.3 ఓవర్లలో 28/2తో నిలిచింది. ఆ సమయంలోనే వర్షం కురవడంతో ఆటను నిలిపివేశారు. తర్వాత వర్షం తగ్గకపోయేసరికి అంపైర్లు రద్దు చేశారు. అయితే, మధ్యలో రుతురాజ్‌ డగౌట్‌లో కూర్చున్న సమయంలో..  మైదాన సిబ్బంది ఒకరు అతడి వద్దకెళ్లి సెల్ఫీ తీసుకునే ప్రయత్నం చేశాడు. అయితే.. గైక్వాడ్‌ అతడిని కాస్త దూరంగా ఉండాలని సైగలు చేస్తూ అసహనం వ్యక్తం చేసినట్లు టీవీలో కనిపించింది. దీంతో అది చూసిన క్రికెట్‌ ప్రేమికులు టీమ్‌ఇండియా బ్యాట్స్‌మన్‌ తీరును తప్పుబడుతున్నారు. గైక్వాడ్‌ ఇలా వ్యవహరించడం ద్వారా ఇతరుల పట్ల వివక్ష చూపుతున్నాడని విమర్శలు చేస్తున్నారు. పలువురు నెటిజన్లు సామాజిక మాధ్యమాల్లో ఆ వీడియోను పంచుకొని అతడిపై ఆగ్రహం వ్యక్తం చేస్తున్నారు.