T20 World Cup: అసహనంతో చేతిని కొట్టుకుని.. ఫైనల్‌కు దూరం

దుబాయ్‌: ఆస్ట్రేలియాతో ఆదివారం జరిగే టీ20 ప్రపంచకప్‌ ఫైనల్‌ ముంగిట న్యూజిలాండ్‌కు ఎదురు దెబ్బ తగిలింది. ఆ జట్టు కీలక బ్యాట్స్‌మన్‌ డెవాన్‌ కాన్వే గాయంతో తుది సమరానికి దూరమయ్యాడు. ఇంగ్లాండ్‌తో సెమీఫైనల్లో 167 పరుగుల ఛేదనలో కాన్వే విలువైన 46 పరుగులు చేసి జట్టు విజయంలో కీలకపాత్ర పోషించాడు. అయితే ఈ మ్యాచ్‌లో ఔటైన తర్వాత అసహనంతో బ్యాట్‌తో కుడి చేతికి పొరపాటున కొట్టుకోవడంతో గాయమైంది. దీంతో అతడు ఫైనల్‌తో పాటు రాబోయే భారత్‌తో టీ20 సిరీస్‌కు కూడా దూరమయ్యాడు. ‘‘అనూహ్యంగా అయిన గాయం కారణంగా ఫైనల్‌ ఆడలేకపోవడం కాన్వేను చాలా బాధిస్తోంది. ఈ గాయం అనుకోకుండా జరిగింది. ప్రపంచకప్‌తో పాటు భారత్‌తో టీ20 సిరీస్‌లకు కాన్వేకు ప్రత్యామ్నాయ ఆటగాడిని ఎంపిక చేయలేదు. అయితే టీమ్‌ఇండియా టెస్టు సిరీస్‌కు అందుబాటులో ఉన్న ఆటగాళ్లను పరిశీలిస్తున్నాం’’ అని న్యూజిలాండ్‌ క్రికెట్‌ బోర్డు తెలిపింది.