Viral video: అభిమాని వదిలిన కాగితపు విమానం.. దూసుకొచ్చి గోల్‌ కొట్టింది..

బెర్లిన్‌: అది యూఈఎఫ్‌ఏ నేషన్స్‌ లీగ్‌.. జర్మనీ, ఇంగ్లాండ్‌ ఫుట్‌బాల్‌ జట్ల మధ్య ఉత్కంఠ రేపే పోరు జరుగుతోంది. ఇంతలో మైదానంలోకి దూసుకొచ్చిన ఓ కాగితపు విమానం అందరి దృష్టినీ ఆకర్షించింది. అంతా చూస్తుండగానే ఆటగాళ్ల చుట్టూ తిరిగి కొన్ని సెకన్ల పాటు గాల్లో చక్కర్లు కొట్టింది. చివరకు  గోల్‌ కొట్టినట్టుగా నెట్‌లోకి వెళ్లి పడటంతో స్టేడియం హోరెత్తింది. 

జర్మనీలో ఉన్న అలియాంజ్‌ అరేనా స్టేడియంలో ఈ ఏడాది జూన్‌లో జరిగిన మ్యాచ్‌ సందర్భంగా ఈ సన్నివేశం కనిపించింది. ఓ అభిమాని మ్యాచ్‌ టికెట్‌తో సరదాగా ఓ విమానాన్ని చేసి దాన్ని గ్రౌండ్‌లోకి వదిలాడు. అదికాస్తా ఆటగాళ్ల మధ్యకు చేరి.. అక్కడి నుంచి అచ్చం గోల్‌కొట్టినట్లు నెట్‌లోకి వెళ్లి పడింది. ఈ వీడియోను ఓ నెటిజన్ ట్విటర్‌లో పోస్ట్‌ చేయగా.. ‘‘ఇది గిన్నిస్‌ రికార్డుల్లోకి ఎక్కాల్సిన విషయం’’, ‘‘అద్భుతమైన గోల్‌’’ అంటూ అభిమానులు కామెంట్లు చేస్తున్నారు.