Breaking | Feedback | ePratibha | E-PAPER | Pratibha

బుడగలో కష్టమే.. కానీ తప్పదు

కరోనా మహమ్మారి కారణంగా బయో సెక్యూర్‌ బబుల్‌ (బుడగ)లో క్రీడా టోర్నీలు నిర్వహించాల్సి వస్తోందని.. క్రీడాకారులకు కఠినమైన క్వారంటైన్‌ ఆంక్షలు విధించినప్పటికీ అది కేవలం ఆట...

Published : 04 Feb 2021 07:47 IST

ఈనాడుతో విష్ణువర్ధన్‌

కరోనా మహమ్మారి కారణంగా బయో సెక్యూర్‌ బబుల్‌ (బుడగ)లో క్రీడా టోర్నీలు నిర్వహించాల్సి వస్తోందని.. క్రీడాకారులకు కఠినమైన క్వారంటైన్‌ ఆంక్షలు విధించినప్పటికీ అది కేవలం ఆట కోసమేనని ఒలింపియన్‌ విష్ణువర్ధన్‌ అన్నాడు. సోమవారం ఆరంభమయ్యే ఆస్ట్రేలియన్‌ ఓపెన్‌ పురుషుల సింగిల్స్‌లో.. మన దేశానికి చెందిన సుమిత్‌ నగాల్‌ రాణించే అవకాశం ఉందని అతను తెలిపాడు. బుధవారం ‘ఈనాడు’తో మాట్లాడిన ఈ హైదరాబాద్‌ టెన్నిస్‌ ఆటగాడు ఎన్నో విషయాలు పంచుకున్నాడు. ఆ విశేషాలు అతని మాటల్లోనే..!

ఈనాడు డిజిటల్, హైదరాబాద్‌: ఆస్ట్రేలియన్‌ ఓపెన్‌ కోసం ఆటగాళ్లకు 14 రోజల కఠిన క్వారంటైన్‌ విధించారు. ప్రస్తుత పరిస్థితుల్లో అది తప్పదు. కష్టమైనా ఆట కోసం ఆంక్షలు అమలు చేయాల్సిందే. ఇది ఆటగాళ్ల ప్రదర్శనపై ప్రభావం చూపే వీలుందనే ఉద్దేశంతో ఆస్ట్రేలియన్‌ ఓపెన్‌ ఆరంభానికి ముందు ప్రాక్టీస్‌ కోసం డబ్ల్యూటీఏ, ఏటీపీ టోర్నీలు నిర్వహిస్తున్నారు. ఈ టోర్నీలో భారత ఆటగాడు సుమిత్‌ నగాల్‌ ఆకట్టుకుంటాడనే నమ్మకంతో ఉన్నా. గత కొన్నేళ్లుగా అతని ఆటతీరు మెరుగవుతోంది. వైల్డ్‌కార్డు ద్వారా టోర్నీలో అడుగుపెట్టబోతున్న అతను.. పురుషుల సింగిల్స్‌లో సత్తాచాటతాడు. మరోవైపు డబుల్స్‌లో బోపన్న, దివిజ్‌ శరణ్‌ జోడీలు కూడా రాణిస్తాయని అనుకుంటున్నా. పురుషుల సింగిల్స్‌లో థీమ్‌ (ఆస్ట్రియా), మహిళల సింగిల్స్‌లో సెరెనా (యుఎస్‌) టైటిళ్లు గెలుస్తారని నా అంచనా.

మరింత కష్టపడాలి..: ఇటీవల కాలంలో పురుషుల సింగిల్స్‌లో నగాల్, రామ్‌కుమార్, ముకుంద్‌ లాంటి భారత ఆటగాళ్లు అంతర్జాతీయ వేదికలపై మంచి ప్రదర్శనే చేస్తున్నప్పటికీ గ్రాండ్‌స్లామ్‌ల్లో మాత్రం టైటిల్‌కు దగ్గరగా వెళ్లట్లేదు. ఆ లక్ష్యాన్ని చేరుకోవాలంటే వాళ్లు మరింత శ్రమించాలి. వాళ్లకు మంచి శిక్షణ అందించాలి. టెన్నిస్‌లో జాతీయ శిక్షణ శిబిరం నిర్వహించాలన్నది మంచి ఆలోచన. తెలంగాణలోనూ యువ ఆటగాళ్లను సానబెట్టే దిశగా రాష్ట్ర క్రీడా మంత్రి శ్రీనివాస్‌ గౌడ్, టెన్నిస్‌ సంఘంతో మాట్లాడా. అందరం కలిసి త్వరలోనే ఓ మంచి కార్యక్రమం చేపట్టబోతున్నాం. 2012 లండన్‌ ఒలింపిక్స్‌లో నా ఆరాధ్య ఆటగాడైన లియాండర్‌ పేస్‌తో కలిసి డబుల్స్‌లో ఆడడం జీవితంలో మర్చిపోలేని జ్ఞాపకం. అలాగే 2010 ఆసియా క్రీడల్లో సానియాతో కలిసి మిక్స్‌డ్‌ డబుల్స్‌లో కలిసి రజతం నెగ్గడం నా కెరీర్‌ను మలుపు తిప్పింది.

ఇవీ చదవండి..
వెనుక ఉండి విరాట్‌కు సహకరిస్తా
భారత్‌తో కూడా ఇలానే చెప్పగలరా?

► Read latest Sports News and Telugu News

► Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.