Ashwin: అశ్విన్‌ ‘ట్విటర్‌ ఖాతా’ కష్టాలు.. పరిష్కరించాలని మస్క్‌కు వేడుకోలు

ఇంటర్నెట్ డెస్క్‌: టీమ్‌ఇండియా ఆల్‌రౌండర్‌ రవిచంద్రన్ అశ్విన్ (Ravichandran Ashwin) సోషల్‌ మీడియాలో యాక్టివ్‌గా ఉంటాడు. ఇంటర్వ్యూలు, వీడియోలు, ఫొటోలు షేర్ చేస్తూ అభిమానులతో నిరంతరం టచ్‌లో ఉండేందుకు ఇష్టపడతాడు. బోర్డర్ - గావస్కర్‌ ట్రోఫీ ముగియడంతో అశ్విన్‌కు విరామం దొరికింది. దీంతో ట్విటర్‌లోకి (Twitter) వచ్చేసిన అశ్విన్‌.. తన ఖాతా సెక్యూరిటీపై ఆందోళన వ్యక్తం చేస్తూ ఎలాన్‌ మస్క్‌కు రిక్వెస్ట్‌ పెట్టాడు.

‘‘నా ట్విటర్ ఖాతాకు సంబంధించి భద్రతపై ఆందోళనగా ఉంది.  తరచూ ఏవో పాప్‌అప్స్‌ (వేరే పేజీకి రీడైరెక్ట్‌ చేసేవి/ సమాచారం అందించేవి) వస్తున్నాయి. ఆ లింక్‌లను క్లిక్‌ చేస్తే ఎలాంటి సమాచారం రావడం లేదు.  అయితే మార్చి 19వ తేదీ వరకు గడువునిస్తూ పాప్‌అప్స్‌ లింక్‌లు కనిపిస్తున్నాయి. కాబట్టి, అప్పటిలోగా నా ఖాతాను ఎలా భద్రంగా ఉంచుకోవాలనేదానిపై మీరు (ఎలాన్‌ మస్క్) చెబితే బాగుంటుంది’’ అని ట్విటర్‌ వేదికగా అశ్విన్‌ పోస్టు చేశాడు. 

ఎలాన్ మస్క్ ‘ట్విటర్ బ్లూ’ను తీసుకొచ్చినప్పటి నుంచి ట్విటర్‌ ఖాతాల నిర్వహణ, భద్రత విషయంలో నెటిజన్లు ఆందోళన వ్యక్తం చేస్తున్నారు. ఇప్పుడు అశ్విన్ చెప్పింది మరో సమస్య. అయితే అశ్విన్‌ ఎదుర్కొంటున్న సమస్య ఏంటనే విషయంలో క్లారిటీ రావాల్సి ఉంది.