National games: 36వ జాతీయ క్రీడలను ప్రారంభించిన ప్రధాని మోదీ

అహ్మదాబాద్‌: గుజరాత్‌లోని గాంధీనగర్‌లో 36వ జాతీయ క్రీడలను ప్రధాని మోదీ ప్రారంభించారు. ఈ సందర్భంగా ప్రధాని మాట్లాడుతూ.. ప్రపంచంలోనే అతిపెద్ద  స్టేడియంలో క్రీడలు నిర్వహిస్తున్నామన్నారు. గతంలో మన అథ్లెట్లు వందలోపు ఈవెంట్లలోనే పాల్గొనేవారని, ఇప్పుడు 300కు పైగా అంతర్జాతీయ ఈవెంట్లలో పాల్గొంటున్నారని చెప్పారు. గుజరాత్‌లోని పలు వేదికల్లో అక్టోబరు 12 వరకు ఈ జాతీయ క్రీడలను నిర్వహించనున్నారు. ఈ కార్యక్రమంలో క్రీడల శాఖ మంత్రి అనురాగ్‌ ఠాకూర్‌తోపాటు ఒలింపిక్‌ గేమ్స్‌ విజేతలు పీవీ సింధు, నీరజ్‌ చోప్రా, రవికుమార్‌ దహియా తదితరులు పాల్గొన్నారు.

వివిధ కారణాలతో వాయిదా పడిన ఈ క్రీడలను దాదాపు ఏడేళ్ల తర్వాత తిరిగి నిర్వహిస్తున్నారు. చివరిగా 2015లో కేరళలో నిర్వహించారు. మొత్తం 28 రాష్ట్రాలు, 8 కేంద్ర పాలిత ప్రాంతాల నుంచి దాదాపు 7000 మంది అథ్లెట్లు ఈ క్రీడల్లో పాల్గొననున్నారు. 36 క్రీడా విభాగాల్లో పోటీలు జరగనున్నాయి. ఇప్పటికే ఈ క్రీడల్లో భాగంగా కొన్ని క్రీడాంశాల్లో పోటీలు ఆరంభమయ్యాయి. కానీ అధికారికంగా గురువారం మోదీ ఈ కార్యక్రమాన్ని ప్రారంభించారు. ఈ క్రీడలకు గుజరాత్‌ తొలిసారిగా ఆతిథ్యమిస్తోంది.