Modi: సింధు.. ఛాంపియన్లకే ఛాంపియన్‌

దిల్లీ: కామన్వెల్త్ క్రీడల్లో తెలుగు తేజం పీవీసింధు భారత్‌కు స్వర్ణం సంపాదించిపెట్టారు. కెనడా క్రీడాకారిణి మిచెలీ లీపై వరుస గేమ్స్‌లో ఆధిపత్యం చెలాయించి సింధు ఈ పతకాన్ని దక్కించుకుంది. దీంతో ఈ బ్యాడ్మింటన్‌ స్టార్‌పై ప్రశంసల వర్షం కురిసింది.

* పీవీ సింధు.. ఛాంపియన్లకే ఛాంపియన్‌. అత్యున్నత ప్రతిభ ఏంటో ఆమె ప్రతిసారి చూపిస్తున్నారు. ఆమె నిబద్ధత విస్మయానికి గురిచేస్తోంది. కామన్వెల్త్ క్రీడల్లో స్వర్ణం సాధించిన ఆమెకు అభినందనలు. ఆమె భవిష్యత్తులో మరిన్ని విజయాలు సాధించాలని ఆకాంక్షిస్తున్నాను... ప్రధాని మోదీ 

* భారత షట్లర్ పీవీ సింధు అత్యుత్తమ ప్రదర్శన కనబర్చి.. ఈ దేశానికి గర్వపడేలా చేశారు. కామన్వెల్త్ క్రీడల్లో బంగారు పతకం గెలిచిన మీకు అభినందనలు... కేంద్ర హోం మంత్రి అమిత్‌ షా 

* పీవీ సింధు.. మీరు ఈ దేశ ప్రజలను ఆశ్చర్యపర్చడంలో ఎప్పటికీ విఫలం కారు. మీరు నారీ శక్తికి ప్రతిరూపం.. కేంద్రమంత్రి స్మృతి ఇరానీ