PV Sindu: సెమీస్‌లో సింధు

సాత్విక్‌ జోడీ ముందంజ

బాలి: ఇండోనేసియా ఓపెన్‌ సూపర్‌ 1000 టోర్నీలో భారత స్టార్‌ షట్లర్‌ పి.వి.సింధు సెమీఫైనల్లో అడుగుపెట్టింది. శుక్రవారం మహిళల సింగిల్స్‌ క్వార్టర్‌ఫైనల్లో మూడో సీడ్‌ సింధు 14-21, 21-19, 21-14తో సిమ్‌ యుజిన్‌ (కొరియా)పై గెలుపొందింది. 66 నిమిషాల పాటు హోరాహోరీగా సాగిన పోరులో ప్రత్యర్థిపై సింధు పైచేయి సాధించింది. పురుషుల డబుల్స్‌లో సాత్విక్‌ సాయిరాజు- చిరాగ్‌శెట్టి జోడీ సెమీస్‌లోకి దూసుకెళ్లింది. క్వార్టర్స్‌లో ఆరో సీడ్‌ సాత్విక్‌- చిరాగ్‌ 21-19, 21-19తో జో ఫెయ్‌- నూర్‌ ఐజుద్దీన్‌ (మలేసియా)పై నెగ్గారు. పురుషుల సింగిల్స్‌లో సాయి ప్రణీత్‌ పోరాటం ముగిసింది. క్వార్టర్స్‌లో సాయి ప్రణీత్‌ 12-21, 8-21తో రెండో సీడ్‌ విక్టర్‌ అక్సెల్సెన్‌ (డెన్మార్క్‌) చేతిలో ఓడాడు. శనివారం జరిగే సెమీఫైనల్స్‌లో రెండో సీడ్‌ ఇంతానన్‌ రచనోక్‌ (థాయ్‌లాండ్‌)తో సింధు, టాప్‌ సీడ్‌ మార్కస్‌ గిడియోన్‌- కెవిన్‌ సుకములో (ఇండోనేసియా)తో సాత్విక్‌- చిరాగ్‌ తలపడతారు.