WTC Final 2023: అజింక్య రహానే.. ఆ బాధ్యత నీదే: రాహుల్‌ ద్రవిడ్‌

ఇంటర్నెట్ డెస్క్: ప్రపంచ టెస్టు ఛాంపియన్‌షిప్‌ ఫైనల్‌ (WTC Final 2023) సంగ్రామం సిద్ధమవుతోంది. ఆస్ట్రేలియా, భారత ఆటగాళ్ల సన్నద్ధ కొనసాగుతోంది. బుధవారం నుంచి డబ్ల్యూటీసీ ఫైనల్‌ ప్రారంభం కానుంది. సీనియర్‌ ఆటగాడు అజింక్య రహానే మళ్లీ జట్టులోకి వచ్చాడు. ఈ  క్రమంలో టీమ్‌ఇండియా ప్రధాన కోచ్ రాహుల్ ద్రవిడ్‌ పలు కీలక సూచనలు చేశాడు. డబ్ల్యూటీసీ ఫైనల్‌ నేపథ్యంలో ద్రవిడ్ ప్రెస్‌ కాన్ఫరెన్స్‌ నిర్వహించాడు. మ్యాచ్‌ సన్నద్ధత సహా ఇతర అంశాలపై మాట్లాడాడు.

‘‘డబ్ల్యూటీసీ ఫైనల్‌ కోసం బాగా సన్నద్ధమయ్యాం. ఈసారి ఎలాగైనా గెలిచి టైటిల్‌ను సొంతం చేసుకుంటాం. కొంతమంది గాయాలబారిన పడినప్పటికీ మా జట్టులో అనుభవం కలిగిన ఆటగాళ్లు ఉండటం సానుకూలాంశం. చాలా రోజుల తర్వాత జట్టులోకి వచ్చిన రహానే కీలక పాత్ర పోషిస్తాడని భావిస్తున్నా. రహానే నాణ్యమైన క్రికెటర్. అతడి అనుభవం సహచరులకు అందించాలి. ఓవర్సీస్‌ పరిస్థితుల్లోనూ రహానే అద్భుతంగా ఆడాడు. ఇంగ్లాండ్‌ పిచ్‌లపై కూడా మంచి ప్రదర్శనే ఇచ్చాడు. చాలా మంచి ఇన్నింగ్స్‌లు ఆడాడు. ఫీల్డర్‌గానూ అదరగొడతాడు. స్లిప్స్‌లో మంచి క్యాచ్‌లను అందుకోగలడు. ఈ సందర్భంగా రహానేకు ఒక్క సూచన చేస్తున్నా.. అతడి వ్యక్తిగత ప్రదర్శనను సహచరులకూ అందించాలనేది నా విజ్ఞప్తి.

కేవలం ఇదొక్క మ్యాచ్‌కు మాత్రమే కాకుండా భవిష్యత్తులోనూ ఇదే దూకుడుగా ఉండాలి. మరిన్ని టెస్టులు ఆడగల సామర్థ్యం రహానే సొంతం. గాయం నుంచి కోలుకుని వచ్చాక ఆటగాళ్లు ఎలా ఆడతారనేది ఎవరికీ తెలియదు. అలాగే, జట్టు నుంచి వైదొలిగి పునఃప్రవేశం తర్వాత పుంజుకొని ఆడగలరు. మంచి ప్రదర్శన చేస్తే చాలా మ్యాచ్‌లు ఆడే అవకాశాలు వెతుక్కుంటూ వస్తాయి’’ అని ద్రవిడ్ తెలిపాడు.