Published : 03 Jul 2022 14:54 IST

Ravi Shastri : నేను పొరపాటున కోచ్‌ అవతారం ఎత్తా.. రాహుల్‌ అలా కాదు: రవిశాస్త్రి

ఇంటర్నెట్ డెస్క్: టీమ్ఇండియా ప్రధాన కోచ్ రాహుల్‌ ద్రవిడ్ అద్భుతంగా జట్టును నడిపిస్తున్నాడని మాజీ కోచ్ రవిశాస్త్రి ప్రశంసించాడు. అదేవిధంగా ద్రవిడ్ భారత టీమ్‌ను ఉన్నత శిఖరాలకు తీసుకెళ్తున్నాడని పేర్కొన్నాడు. ‘‘నేను కోచింగ్‌ బాధ్యతల నుంచి వీడ్కోలు పలికిన తర్వాత దానికి సరైన వ్యక్తి రాహుల్ ద్రవిడ్‌ మాత్రమే. ఇంకెవరూ కాదనేది నా అభిప్రాయం. అసలు నేనే పొరపాటున కోచ్‌గా మారా. కామెంట్రీ బాక్స్‌లో కూర్చొని ఉండే నాకు కోచింగ్‌ బాధ్యతలు అప్పగించారు. జట్టును నడిపించడంలో నావంతు కృషి చేశా. అయితే రాహుల్‌ మాత్రం నా మాదిరిగా కాదు. ఓ క్రమ పద్ధతిగా ఒక్కో మెట్టు ఎక్కుతూ వచ్చాడు. అండర్‌-19, టీమ్‌ఇండియా సెకండ్‌ టీమ్‌లకు కోచ్‌గా బాధ్యతలు చేపట్టాడు. సీనియర్‌ జట్టుకు ప్రధాన్‌ కోచ్‌ అయ్యాడు. తన సలహాలు, సూచనలను టీమ్‌ సభ్యులు అందుకొని రాణిస్తే ఎలాంటి కోచ్‌కైనా హాయిగా ఉంటుంది. ఇప్పుడు ద్రవిడ్ కూడా అందులోని కిక్‌ను ఎంజాయ్‌ చేస్తున్నాడు’’ అని పేర్కొన్నాడు. 

రవిశాస్త్రి హయాంలో భారత్‌ ఐసీసీ ట్రోఫీని మినహా ఎన్నో రికార్డులను తన ఖాతాలో వేసుకుంది. ఇంగ్లాండ్, ఆస్ట్రేలియా గడ్డపై సిరీస్‌లను కైవసం చేసుకొని అద్భుతాలు సృష్టించింది. ‘‘కోచ్‌గా మారిన వ్యక్తికి విమర్శలను పట్టించుకోని తత్వం ఉండాలి. అయితే నా చివరి రోజుల్లో మీడియాతో కాస్త కంగారు పడాల్సి వచ్చింది. ఆటగాళ్లు బాగా ఆడితే ఒకరకంగా.. విఫలమైతే మరో రకంగా వ్యాఖ్యలు వినాల్సి ఉంటుంది. అయితే మీడియా వల్లనే నా పని కాస్త తేలికగా మారిందనే చెప్పొచ్చు. ఎందుకంటే స్వదేశంలో తప్పితే విదేశాల్లో రాణించలేమనే మీడియా కథనాలను తప్పుగా నిరూపించడమే నా జాబ్‌గా భావించా. దాని కోసం జట్టుతో కూర్చొని సరైన మార్గంలో నడిపించేందుకు ప్రయత్నించా. విరాట్‌తో ప్రత్యేకంగా మాట్లాడినప్పుడు పిచ్‌ ఏదైనా సరే మనం 20 వికెట్లను తీయాలని చెప్పేవాడిని’’ అని రవిశాస్త్రి వివరించాడు. రాహుల్ ద్రవిడ్‌ హయం వచ్చేసరికి టీమ్‌లో సారథుల సంఖ్య ఎక్కువైపోయిందనే చెప్పొచ్చు. అందుకే వేర్వేరు సిరీస్‌లకు ప్రత్యేకంగా జట్టును తయారు చేసి మరీ బీసీసీఐ పంపించింది. రాబోయే టీ20 ప్రపంచకప్‌ను దృష్టిలో పెట్టుకొని ఆటగాళ్లను సిద్ధంగా ఉంచుకోవడానికి ఈ ప్రక్రియను చేపట్టింది.

Read latest Sports News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని