Ravindra Jadeja : తొమ్మిది పడగొడితే.. జడేజా ఖాతాలోకి మరో ఘనత

మూడో టీమ్‌ఇండియా బౌలర్‌గా మారే అవకాశం

ఇంటర్నెట్ డెస్క్‌: ఐసీసీ టెస్టు ఆల్‌రౌండర్ల జాబితాలో అగ్రస్థానం దక్కించుకున్న టీమ్ఇండియా ఆటగాడు రవీంద్ర జడేజా మరో మైలురాయిని అందుకునేందుకు సిద్ధమయ్యాడు. శనివారం నుంచి శ్రీలంకతో గులాబీ బంతి టెస్టు జరగనుంది. తొలి టెస్టులో జడేజా 175 పరుగులు, తొమ్మిది వికెట్లు తీసి సంచలనం సృష్టించిన విషయం తెలిసింది. ఈ క్రమంలో మరో 9 వికెట్లను పడగొడితే టెస్టుల్లో 250 వికెట్ల మైలురాయిని అందుకునే అవకాశం ఉంది. ఈ ఫీట్‌ను అత్యంత వేగంగా సాధించిన మూడో టీమ్‌ఇండియా బౌలర్‌గా నిలుస్తాడు. జడేజా కంటే ముందు అశ్విన్‌ (42), అనిల్ కుంబ్లే (55) మాత్రమే తక్కువ మ్యాచుల్లో ఈ మైలురాయిని చేరుకున్నారు.  ప్రస్తుతం జడేజా 58 టెస్టుల్లో 241 వికెట్లతో కొనసాగుతున్నాడు. అదే విధంగా అక్షర్‌ పటేల్ (94) ‘వంద’ క్లబ్‌లో చేరేందుకు ఆరు వికెట్ల దూరంలోనే ఉన్నాడు. 

అక్షర్‌ ఆ ఘనత అందుకునేనా.?

మరోవైపు, టీమ్ఇండియా యువ స్పిన్నర్‌ అక్షర్‌ పటేల్‌ మరో అరుదైన ఘనతకు చేరువయ్యాడు. రేపటి నుంచి (మార్చి 12) శ్రీలంకతో జరుగనున్న రెండో టెస్టు మ్యాచులో అక్షర్‌ 14 వికెట్లు పడగొడితే.. 133 ఏళ్ల క్రితం నాటి రికార్డు సమం కానుంది. ఆస్ట్రేలియాకు చెందిన ఛార్లెస్ టర్నర్‌ 1880లో.. టెస్టు క్రికెట్లో అత్యంత వేగంగా 50 వికెట్లు తీసిన బౌలర్‌గా రికార్డు సృష్టించాడు. అతడు కేవలం 6 టెస్టుల్లోనే 50 వికెట్లు పడగొట్టడం గమనార్హం. ఇప్పటివరకు 5 టెస్టులు ఆడిన అక్షర్ 36 వికెట్లు పడగొట్టాడు. శ్రీలంకతో జరుగనున్న పింక్‌ బాల్ టెస్టులో ఒకవేళ అక్షర్‌ 14 వికెట్లు పడగొడితే.. ఛార్లెస్ రికార్డును సమం చేయనున్నాడు.

జడ్డూలా షహీన్ బౌలింగ్‌.. వీడియో వైరల్‌

పాకిస్థాన్‌ పేసర్‌ షహీన్‌ అఫ్రిది కాసేపు టీమ్‌ఇండియా బౌలర్‌ రవీంద్ర జడేజా మాదిరిగా మారిపోయాడు. ప్రస్తుతం పాక్‌లో ఆసీస్‌ పర్యటన కొనసాగుతోంది. రేపటి నుంచి కరాచీ వేదికగా రెండో టెస్టు మ్యాచ్‌ జరగనుంది. దీంతో ఇరు జట్ల ఆటగాళ్లు తీవ్రంగా సాధన చేస్తున్నారు. ఈ క్రమంలో షహీన్‌ సరదాగా బ్యాటర్లకు స్పిన్‌ బౌలింగ్‌ చేశాడు. అది కూడానూ అచ్చం రవీంద్ర జడేజా బౌలింగ్ స్టైల్‌తో ఉండటం విశేషం. దీనికి సంబంధించిన వీడియో నెట్టింట్లో వైరల్‌గా మారింది. ‘‘భలేగా కాపీ చేశాడు’’ .. ‘‘వందశాతం జడేజా యాక్షన్‌’’ అంటూ కామెంట్లు పెడుతున్నారు. మరి ఆ వీడియోను మీరూ చూసేయండి..