WPL: సోఫీ సెంచరీ మిస్‌.. ఆర్‌సీబీ ఘన విజయం

ముంబయి: ఆర్‌సీబీ (RCB) విజయదుందుభి మోగించింది. డబ్ల్యూపీఎల్‌ (WPL)లో భాగంగా గుజరాత్‌ జెయింట్స్‌తో జరిగిన మ్యాచ్‌ 8 వికెట్ల తేడాతో గెలుపొందింది.189 పరుగుల లక్ష్యాన్ని రెండు వికెట్లు కోల్పోయి 15.3 ఓవర్లలోనే ఛేదించింది. సోఫీ డివైన్‌ (99; 36 బంతుల్లో 9×4, 8×6) చెలరేగి పోవడడంతో గుజరాత్‌ స్కోరు చిన్నబోయింది. స్మృతి మంధాన (37) ఆమెకు చక్కని సహకారం అందించింది. లక్ష్య ఛేదన ప్రారంభించిన ఆర్‌సీబీని గుజరాత్‌ ఏ దశలోనూ నిలువరించలేక పోయింది.  ఓపెనర్లిద్దరూ  కలిసి తొలి వికెట్‌కు 125 పరుగుల భాగస్వామ్యం నెలకొల్పారు. అయితే 99 పరుగుల వ్యక్తిగత స్కోరు వద్ద కిమ్‌ గర్త్‌ బౌలింగ్‌లో  అశ్వని కుమారికి క్యాచ్‌ ఇచ్చి సోఫీ డివైన్‌ వెనుదిరడడం కాస్త నిరాశ కలిగించింది.

ఆ తర్వాత క్రీజులోకి వచ్చిన పెర్రీ (19*)తో కలిసి మంధాన ఇన్నింగ్స్‌ను కొనసాగించింది. అయితే జట్టుస్కోరు 157 పరుగుల వద్ద స్నేహ్‌ రానా వేసిన  11.5వ బంతికి  మంధాన కాట్‌ అండ్‌ బౌల్డ్‌గా వెనుదిరిగింది. అనంతరం క్రీజులోకి వచ్చిన  హీదర్‌ నైట్‌ (22*)తో కలిసి పెర్రీ లాంఛనాన్ని పూర్తి చేసింది. అంతకు ముందు టాస్‌ గెలిచి బ్యాటింగ్‌కు దిగిన గుజరాత్‌ నిర్ణీత 20 ఓవర్లలో 4 వికెట్లు కోల్పోయి 188 పరుగులు చేసింది. ఓపెనర్‌ లూరా వోల్వార్డ్‌ (68; 42 బంతుల్లో 9×4,2×6) అర్ధశతకంతో చెలరేగగా.. సబ్బినేని మేఘన (31; 32 బంతుల్లో 4×4), గార్డెనర్‌ (41; 26 బంతుల్లో 6×4, 1×6) రాణించారు.  ఆర్సీబీ బౌలర్లలో శ్రేయంక పాటిల్‌ 2 వికెట్లు పడగొట్టగా.. సోఫీ డివైన్‌, ప్రీతి బోస్‌ చెరో వికెట్‌ తీశారు.