IND vs BAN: బంగ్లాతో వన్డేకు పంత్‌ దూరం.. కారణం ఇదే: బీసీసీఐ

ఢాకా: బంగ్లాదేశ్‌తో వన్డే సిరీస్‌కు టీమ్‌ఇండియా వికెట్‌ కీపర్‌ బ్యాటర్‌ రిషభ్‌ పంత్‌ దూరమయ్యాడు. ఈ విషయాన్ని బీసీసీఐ ఆదివారం ప్రకటించింది.  పంత్‌ స్థానంలో మరే ఇతర ఆటగాడిని తీసుకోలేదంటూ తెలిపింది. ఈ సిరీస్‌ అనంతరం టెస్టు సిరీస్‌లో అతడు తిరిగి పాల్గొంటాడని పేర్కొంది. 

‘‘బీసీసీఐ వైద్యుడిని కలిసేందుకు తీసుకున్న అపాయింట్‌మెంట్‌ కారణంగా రిషభ్‌ పంత్‌ బంగ్లాదేశ్‌తో వన్డే సిరీస్‌ ఆడటం లేదు. రానున్న రెండు మ్యాచ్‌ల టెస్టు సిరీస్‌లో అతడు తిరిగి జట్టులో చేరతాడు. అక్షర్‌ పటేల్‌ సైతం అందుబాటులో లేడు.  ప్రస్తుతం పంత్‌ స్థానంలో మరే ఇతర ఆటగాడిని తీసుకోలేదు’’ అంటూ బీసీసీఐ వివరణ ఇచ్చింది.  ఈ ట్వీట్‌పై పంత్‌ అభిమానులు స్పందిస్తూ.. అతడికి నిజంగానే కాస్త విరామం అవసరమంటూ కామెంట్‌ చేస్తున్నారు. ఇక సంజూ శాంసన్‌ అభిమానులు మాత్రం బీసీసీఐ తీరుపై మండిపడుతున్నారు. కనీసం పంత్‌ స్థానంలో ఆడటానికైనా సంజూ శాంసన్‌కు అవకాశం ఇస్తే బాగుంటుందంటూ తమ ఆవేదనను వ్యక్తం చేస్తున్నారు. వెన్ను గాయం కారణంగా సీనియర్‌ పేసర్‌ షమీ సైతం ఈ సిరీస్‌కు దూరమైన సంగతి తెలిసిందే. పంత్‌ స్థానంలో సిరీస్‌ ఓపెనర్‌ బాధ్యతలను కెప్టెన్‌ రోహిత్‌ శర్మ కేఎల్‌ రాహుల్‌కి అప్పగించాడు.