Aakash chopra: పంత్‌పై ట్రోలింగ్‌ చూస్తుంటే ఆశ్చర్యమేస్తోంది: ఆకాశ్‌ చోప్రా

ఆక్లాండ్‌: శుక్రవారం న్యూజిలాండ్‌తో తొలి వన్డేలో రాణించలేకపోయిన రిషభ్‌ పంత్‌పై నెట్టింట ట్రోలింగ్‌ మొదలైంది. ఈ విషయంపై మాజీ ఓపెనర్‌ ఆకాశ్‌ చోప్రా ట్విటర్‌ వేదికగా స్పందించాడు. పంత్‌పై వస్తోన్న విమర్శలు తనకు విస్మయం కలిగిస్తున్నాయన్నాడు. నంబర్‌ 4 స్థానంలో బ్యాటింగ్‌కు దిగిన పంత్‌(15)ను 33వ ఓవర్‌లో ఫెర్గూసన్‌ పెవిలియన్‌కు చేర్చాడు. అర్ధ సెంచరీలు చేసిన శిఖర్‌ ధావన్‌, శుభ్‌మన్‌గిల్‌ సైతం స్వల్ప వ్యవధిలో ఔటయ్యారు. 

కివీస్‌తో టీ20 సిరీస్‌లోనూ ఈ వికెట్‌ కీపర్‌ కేవలం 17 పరుగులు చేసి వెనుదిరిగిన విషయం తెలిసిందే. ఈ ఏడాది టీ20లతో పాటుగా వన్డేల్లోనూ ఈ ఆటగాడి స్కోర్‌పై అభిమానులు అసంతృప్తి వ్యక్తం చేస్తున్నారు. చివరి ఓవర్‌లో 2 ఫోర్లు, 3 సిక్సులతో విజృంభించిన వాషింగ్టన్‌ సుందర్‌ వల్ల చివరి 5 ఓవర్లలో టీమ్‌ఇండియా 56 పరుగులు రాబట్టగలిగింది. ఈ ఆటగాడిపై ఆకాశ్‌ చోప్రా ప్రశంసలు కురిపించాడు. ‘‘సుందర్‌ అద్భుతమైన ఇన్నింగ్స్‌ ఆడాడు. మూడు అర్ధ శతకాలకంటే సుందర్‌ ఆడిన ఇన్నింగ్స్‌ చాలా ప్రభావవంతమైంది. లోయర్‌ ఆర్డర్‌లో ఆడే ఆటగాళ్లను వారి సగటు ఆధారంగా తక్కువ అంచనా వేయకూడదు. ఆటపై వారు ఏ మేరకు ప్రభావం చూపారనేదే ముఖ్యం’’ అంటూ అభినందించాడు.