FIFA: చిక్కడు.. దొరకడులా.. కళ్లుచెదిరే డ్రిబ్లింగ్‌తో గోల్‌..!

ఫుట్‌బాల్‌లో బంతిని అద్భుతంగా డ్రిబిల్‌ చేయగల సత్తా అతికొద్ది ఆటగాళ్లలోనే ఉంటుంది. ఇటలీకి  రాబర్టో బాగియో ఆడుతున్న తొలి ప్రపంచకప్‌లోనే అద్భుతమైన గోల్‌ చేశాడు

Published : 04 Dec 2022 16:49 IST

ఇంటర్నెట్‌డెస్క్‌: ఫుట్‌బాల్‌లో బంతిని అద్భుతంగా డ్రిబిల్‌ చేయగల సత్తా అతికొద్ది ఆటగాళ్లలోనే ఉంటుంది. ఇటలీ ఆటగాడు రాబర్టో బాగియో ఆ కోవకు చెందిన ఆటగాడు..! ఆడుతున్న తొలి ప్రపంచకప్‌లోనే అద్భుతమైన గోల్‌ చేశాడు. ప్రపంచకప్‌ల చరిత్రలోనే కళ్లుచెదిరే గోల్స్‌పై ఫిఫా నిర్వహించిన ఓ పోల్‌లో బాగియో గోల్‌ 7వ స్థానంలో నిలిచింది. రాబర్టోను ఇటలీ జట్టులో ‘ది డివైన్‌ పోనీటెయిల్‌’ అని పిలుస్తారు. మైదానంలోకి దిగితే అతడు ప్రత్యర్థులను బురిడీ కొట్టిస్తూనే ఉంటాడు. 

1990లో ఇటలీ ప్రపంచకప్‌ మ్యాచ్‌లకు వేదికైంది. రాబర్టో బాగియో ఈ టోర్నిలో సబ్‌స్టిట్యూట్‌గా ఆడాడు. గ్రూప్‌ స్థాయిలో చివరి మ్యాచ్‌లో చెకోస్లొవాకియాతో తలపడింది. అప్పటికే ఆడిన అన్ని మ్యాచ్‌ల్లో విజయం సాధించి గ్రూప్‌లో తొలి స్థానంలో ఉంది. చెకోస్లోవాకియాతో జరిగిన మ్యాచ్‌లో ఇటలీ 1-0 ఆధిక్యంలో ఉంది. మ్యాచ్‌ ముగియడానికి 10 నిమిషాల ముందు బంతి రాబర్టో ఆధీనంలోకి వచ్చింది. అక్కడి నుంచి దాదాపు ముగ్గురు  చెకోస్లోవాకియా ఆటగాళ్లు అతడిని వెంబడించారు. వారి నుంచి తప్పించుకొంటూ  గోల్‌ పోస్టు సమీపానికి చేరుకొనే సరికి మొత్తం నలుగురు ఆటగాళ్ల చుట్టుముట్టారు. వారిని తప్పించుకొంటూ బంతిని అద్భుతమైన షాట్‌తో గోల్‌ పోస్టులోకి పంపాడు. ఆ మ్యాచ్‌ను ఇటలీ గెలుచుకొంది. 

ఈ టోర్నీలో ఇటలీ మూడో స్థానంలో నిలిచింది. తొలి సారి ప్రపంచకప్‌ ఆడుతున్న రాబర్టో రెండు గోల్స్‌ చేశాడు. చెకోస్లోవాకియాతో జరిగిన మ్యాచ్‌లో చేసిన గోల్‌ మొత్తం టోర్నమెంట్లోనే అత్యుత్తమైందిగా ఎంపిక చేశారు. 2002 ఫిఫా పోల్‌లో ఆ గోల్‌  ప్రపంచకప్‌ల చరిత్రలోనే 7వ అత్యుత్తమైనదిగా నిలిచింది. రాబర్టో కూడా ఇటలీ ప్రధాన ఆటగాడిగా ఎదిగాడు.


Read latest Sports News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని