BCCI: బీసీసీఐ అధ్యక్ష పదవికి రోజర్‌ బిన్నీ నామినేషన్‌ దాఖలు

ఇంటర్నెట్ డెస్క్‌: బీసీసీఐ అధ్యక్ష పదవి కోసం టీమ్‌ఇండియా మాజీ ఆటగాడు రోజర్‌ బిన్నీ రంగంలోకి దిగారు. బీసీసీఐ పదవుల కోసం అభ్యర్థులు నామినేషన్లు దాఖలుకు రెండు రోజులు అవకాశం కల్పించగా.. తొలిరోజు ఒక్క నామినేషన్‌ మాత్రమే దాఖలైనట్లు తెలుస్తోంది. బుధవారం కూడా ఎవరూ నామినేషన్‌ దాఖలు చేయకపోతే  రోజర్‌ బిన్నీ ఏకగ్రీవంగా ఎన్నిక కావడం ఖాయమవుతుంది.  బిన్నీ 1983 ప్రపంచకప్‌ జట్టులో సభ్యుడు. ఆయన అభ్యర్థిత్వానికి వ్యతిరేకంగా ఎవరూ ఉండకపోవచ్చని ప్రస్తుత వైస్‌ ప్రెసిడెంట్ రాజీవ్ శుక్లా స్పష్టం చేశాడు. ప్రస్తుతం సౌరభ్ గంగూలీ అధ్యక్షుడిగా ఉన్న విషయం తెలిసిందే.

ప్రస్తుత బీసీసీఐ కార్యదర్శి జయ్‌ షా.. మరోసారి సెక్రటరీ పదవికి నామినేషన్‌ దాఖలు చేశారు. ప్రత్యర్థిగా ఎవరూ రంగంలోకి దిగకపోతే వరుసగా రెండోసారి కార్యదర్శిగా పదవిని చేపట్టే అవకాశం ఉంది. సౌరభ్‌ గంగూలీ ఐసీసీ బోర్డులోకి వెళ్తే.. జయ్ షా బీసీసీఐ అధ్యక్షుడిగా బరిలోకి దిగుతాడని ఊహాగానాలు వచ్చాయి. అయితే అధ్యక్ష బరిలోకి రోజర్‌ బిన్నీ రావడం.. గంగూలీ ఇంకా ఎలాంటి నిర్ణయం తీసుకోకపోవడంతో జయ్‌ షా కార్యదర్శిగానే కొనసాగేందుకు నామినేషన్ దాఖలు చేశారు.