IND vs AUS : ‘రోహిత్‌-కోహ్లీ’ మరో రెండు పరుగులు చేస్తే.. ప్రపంచ రికార్డే

ఇంటర్నెట్‌డెస్క్‌ : భారత్‌-ఆస్ట్రేలియా(IND vs AUS)ల మధ్య సిరీస్‌ ఫలితాన్ని తేల్చే మూడో వన్డే చెన్నైలో జరుగుతోంది. తొలి వన్డేలో గెలిచి.. రెండో వన్డేలో అన్ని విభాగాల్లో విఫలమై చిత్తుగా ఓడిన రోహిత్‌ సేనకు కీలక పోరు ఇది. అయితే.. ఈ సిరీస్‌లో పెద్దగా రాణించని రోహిత్‌-కోహ్లీ (Rohit Sharma-Virat Kohli)ల ముందు ఓ ప్రపంచ రికార్డు వేచి ఉంది. వీరిద్దరూ కలిసి మరో 2 పరుగులు చేస్తే.. వన్డేల్లో అత్యంత వేగంగా 5000 పరుగులు పూర్తి చేసిన జంట(fastest pair)గా నిలవనున్నారు.

వన్డేల్లో 85 ఇన్నింగ్స్‌లు ఆడిన రోహిత్‌-కోహ్లీ జంట 4998 పరుగులు చేసింది. ఇక ఈ మూడో వన్డేలో మరో రెండు పరుగులు జోడిస్తే అత్యంత వేగంగా ఐదు వేల పరుగులు చేసిన జంటగా వీరు చరిత్ర సృష్టించనున్నారు. ఇప్పటి వరకూ ఈ రికార్డు వెస్టిండీస్‌ జంట గ్రీనిడ్జ్‌-డెస్మండ్‌ హేన్స్‌ పేరిట ఉంది. వీరు మొత్తం 97 ఇన్నింగ్స్‌లో ఈ మైలు రాయి చేరుకున్నారు. ఆ తర్వాత ఆస్ట్రేలియా జంట  మాథ్యూ హెడెన్‌-గిల్‌క్రిస్ట్‌(104 ఇన్నింగ్స్‌) ఉంది.  ఇక ఈ జాబితాలో నాలుగు వేలకంటే ఎక్కువ పరుగులు చేసిన వారిని తీసుకుంటే.. 60 కంటే ఎక్కువ యావరేజ్‌ ఉన్న ఏకైక జంట రోహిత్‌-కోహ్లీనే కావడం విశేషం.

ఇక వన్డే క్రికెట్‌లో ఎక్కువ పరుగుల భాగస్వామ్యాన్ని నిర్మించిన జంట జాబితాలో రోహిత్‌-కోహ్లీ 8వ స్థానంలో కొనసాగుతున్నారు. ఈ జాబితాలో సచిన్‌-గంగూలీ 8227 పరుగులతో తొలి స్థానంలో ఉన్నారు.