లైయన్‌ పట్ల అసూయగా ఉంది: టేలర్‌ 

టీమ్‌ఇండియా సంతకాలు చేసివ్వడంపై..

ఇంటర్నెట్‌డెస్క్‌: ఆస్ట్రేలియా స్పిన్నర్‌ నాథన్‌ లైయన్‌ పట్ల అసూయగా ఉందని న్యూజిలాండ్‌ స్టార్‌ బ్యాట్స్‌మన్‌ రాస్‌టేలర్‌ అన్నాడు. ఈ ఏడాది ఆరంభంలో టీమ్‌ఇండియా ఆస్ట్రేలియా పర్యటన సందర్భంగా గబ్బా వేదికగా జరిగిన నాలుగో టెస్టులో భారత్‌ చారిత్రక విజయం సాధించిన సంగతి తెలిసిందే. అయితే, ఆ మ్యాచ్‌ ఆసీస్‌ స్పిన్నర్‌ నాథన్‌ లైయన్‌కు వందో టెస్టు కావడం విశేషం. అప్పుడు అజింక్య రహానె నేతృత్వంలోని భారత జట్టు ఒక జెర్సీపై సంతకాలు చేసి జ్ఞాపకంగా లైయన్‌కు అందజేశారు. ఆ విషయాన్ని అప్పుడే అతడు సామాజిక మాధ్యమాల్లో పంచుకొని సంతోషం వ్యక్తం చేశాడు.

కాగా, గతేడాది ఫిబ్రవరిలో టీమ్‌ఇండియా న్యూజిలాండ్‌ పర్యటన సందర్భంగా వెల్లింగ్టన్‌లో ఆడిన తొలి టెస్టు కూడా ఆ జట్టు సీనియర్‌ ఆటగాడు రాస్‌ టేలర్‌కు వందోది. అయితే అప్పుడతడికి టీమ్‌ఇండియా.. లైయన్‌కు ఇచ్చినట్లు సంతకాలు చేసిన జెర్సీ ఇవ్వలేదని తాజాగా అతడు వెల్లడించాడు. ‘గతేడాది నా వందో టెస్టు టీమ్‌ఇండియాపై ఆడాను. అప్పుడు నాకు ఎలాంటి జెర్సీ రాలేదు. ఈ విషయంలో లైయన్‌ పట్ల అసూయగా ఉంది. అతడు భారత జట్టు నుంచి జెర్సీ అందుకున్నప్పుడు ఫర్వాలేదులే అనుకున్నా’ అని టేలర్‌ ఒక క్రికెట్‌ పోడ్‌కాస్ట్‌లో వివరించాడు.