SAFF U19 Championship: నేపాల్‌ను ఓడించిన భారత్.. ఫైనల్లో పాకిస్థాన్‌తో ఢీ

ఇంటర్నెట్‌ డెస్క్: శాఫ్‌ అండర్‌-19 ఫుట్‌బాల్‌ ఛాంపియన్‌షిప్‌లో భారత్‌ ఫైనల్‌కు చేరుకుంది. ఉత్కంఠగా సాగిన సెమీఫైనల్‌ పెనాల్టీ షూటౌట్‌లో 3-2 తేడాతో నేపాల్‌ను ఓడించింది. నిర్ణీత సమయం ముగిసేలోగా ఇరుజట్లు 1-1తో నిలవడంతో మ్యాచ్ టై బ్రేకర్‌కు వెళ్లింది. సాహిల్ ఖుర్షీద్ (26వ నిమిషంలో) గోల్‌ చేసి భారత్‌ను ఆధిక్యంలో నిలిపాడు. నేపాల్‌ ఆటగాడు సమీర్ తమాంగ్ (74వ నిమిషం) గోల్‌ చేసి స్కోరు సమం చేశాడు. 

ఇక పెనాల్టీ షూటౌట్‌లో 2-2తో ఇరుజట్లు హోరాహోరీగా తలపడుతున్న వేళ భారత ఆటగాడు మంగ్లెన్‌తాంగ్ కిప్‌జెన్ బంతిని ఎలాంటి తడబాటు లేకుండా గోల్‌ పోస్ట్‌లోకి పంపి జట్టును విజయతీరాలకు చేర్చాడు. పెనాల్టీ షూటౌట్‌లో భారత్‌ తరఫున కిప్‌జెన్‌తో పాటు అర్జున్ సింగ్, గోయరీ గోల్స్‌ చేశారు. 66వ నిమిషంలో కెప్టెన్ ఇషాన్ శిశోడియా స్థానంలో రిప్లేస్‌మెంట్‌గా వచ్చిన కిప్‌జెన్ గోల్‌కొట్టి జట్టును గెలిపించడం ఆసక్తికరం. భూటాన్‌తో జరిగిన మరో సెమీ ఫైనల్‌లో పాకిస్థాన్‌ 6-5 తేడాతో విజయం సాధించింది. శనివారం జరిగే టైటిల్‌ పోరులో చిరకాల ప్రత్యర్థులు భారత్, పాక్‌ తలపడనున్నాయి.