Sourav Ganguly : బుమ్రా భవిష్యత్‌పై గంగూలీ ఏమన్నాడంటే..?

ఇంటర్నెట్‌ డెస్క్‌ : వెన్ను గాయం కారణంగా భారత పేస్‌ బౌలర్ బుమ్రా దక్షిణాఫ్రికాతో టీ20 సిరీస్‌ తదుపరి మ్యాచ్‌లకు దూరమైన విషయం తెలిసిందే. ప్రపంచ కప్‌ ముంగిట అతడు గాయపడటం టీమ్‌ఇండియాకు పెద్ద ఎదురుదెబ్బే. నెల రోజుల కంటే తక్కువ సమయమే ఉన్న ఈ మెగా టోర్నీకి దాదాపు అతడు దూరమైనట్లే కన్పిస్తోంది. అయితే.. దీనిపై ఇప్పటి వరకూ బీసీసీఐ ఎలాంటి స్పష్టత ఇవ్వలేదు. ఈ నేపథ్యంలో బుమ్రా గురించి బీసీసీఐ అధ్యక్షుడు గంగూలీ స్పందించాడు.

బుమ్రా భవిష్యత్‌పై ఓ నిర్ధారణకు రావడం తొందరపాటే అవుతుందని దాదా వెల్లడించాడు. ‘‘బుమ్రా ఇంకా ప్రపంచకప్‌ నుంచి నిష్క్రమించలేదు. దీనిపై ఉత్కంఠ ఉంది. అతడు జట్టుకు దూరమైనట్లు ఇప్పుడే చెప్పకండి’’ అని ఓ క్రీడా ఛానల్‌తో మాట్లాడుతూ గంగూలీ వ్యాఖ్యానించాడు. బుమ్రా ఆస్ట్రేలియాకు వెళ్తాడా? అన్న ప్రశ్నకు స్పందిస్తూ..‘నాకు తెలియదు.. రెండు మూడు రోజుల్లో దీని గురించి తెలుస్తుంది’ అని సమాధానమిచ్చాడు.

బుమ్రా గాయం కారణంగా దక్షిణాఫ్రికాతో టీ20 సిరీస్‌కు అతడి స్థానంలో హైదరాబాద్‌ పేసర్‌ మహమ్మద్‌ సిరాజ్‌ను ఎంపిక చేసిన విషయం తెలిసిందే.