T20 Cricket: టీ20 క్రికెట్‌లో ప్రపంచ రికార్డు సృష్టించిన సౌతాఫ్రికా..

ఇంటర్నెట్ డెస్క్‌: సాధారణంగా టీ20 మ్యాచ్‌ల్లో అత్యధిక మ్యాచ్‌ల్లో 200కు మించి  స్కోర్లు నమోదు కావు.  కొన్నిసార్లు 230-240 వరకూ నమోదైన సందర్భాలున్నాయి. కానీ, ఆ స్కోర్లను ఛేదించడంలో చాలా జట్లు చతికిలపడతాయి. కానీ, వెస్టిండీస్‌, దక్షిణాఫ్రికా (WI vs SA) మధ్య జరిగిన రెండో టీ20లో ఒక జట్టును మించి మరొకటి స్కోర్లను నమోదు చేశాయి. ఈ మ్యాచ్‌లో దక్షిణాఫ్రికా (South Africa) సరికొత్త ప్రపంచ రికార్డు సృష్టించింది. టీ20ల్లో అత్యధిక టార్గెట్‌ను ఛేదించిన జట్టుగా రికార్డుల్లోకెక్కింది. విండీస్ నిర్దేశించిన 259 పరుగుల లక్ష్యాన్ని 7 బంతులు మిగిలుండగానే ఛేదించి ప్రపంచ రికార్డును తన పేరిట లిఖించుకుంది. అంతకుముందు ఈ రికార్డు ఆస్ట్రేలియా పేరిట ఉండేది. 2018లో న్యూజిలాండ్‌తో జరిగిన టీ20 మ్యాచ్‌లో 245 పరుగుల లక్ష్యాన్ని ఆస్ట్రేలియా ఛేదించింది. ఇప్పటి వరకు ఇదే అత్యధిక ఛేజింగ్‌ కాగా.. తాజా మ్యాచ్‌తో ఆసీస్‌ రికార్డును దక్షిణాఫ్రికా బద్దలు కొట్టింది.

ఈ మ్యాచ్‌లో తొలుత బ్యాటింగ్‌ చేసిన విండీస్‌.. జాన్సన్‌ చార్లెస్‌ (118; 46 బంతుల్లో 10 ఫోర్లు, 11 సిక్స్‌లు) విధ్వంసం సృష్టించడతో నిర్ణీత 20 ఓవర్లలో 5 వికెట్ల నష్టానికి 258 పరుగులు చేసింది. చార్లెస్‌ 39 బంతుల్లోనే శతకం పూర్తి చేసుకున్నాడు. ఈ క్రమంలోనే టీ20ల్లో వెస్టిండీస్‌ తరఫున వేగవంతమైన సెంచరీ చేసిన ఆటగాడిగా నిలిచాడు. కైల్ మేయర్స్‌ (51; 27 బంతుల్లో 5 ఫోర్లు, 4 సిక్స్‌లు), రొమారియో షెపర్డ్ (41; 18 బంతుల్లో 1 ఫోర్‌, 4 సిక్స్‌లు) కూడా దూకుడుగా ఆడారు. 

సౌతాఫ్రికా బ్యాటర్లలో క్వింటన్‌ డికాక్‌ (100; 44 బంతుల్లో 9 ఫోర్లు, 8 సిక్స్‌లు)  అద్భుతమైన శతకం బాదాడు. రిజా హెండ్రిక్స్‌ (68; 28 బంతుల్లో 4 ఫోర్లు, 2 సిక్స్‌లు) కూడా మెరుపు ఇన్నింగ్స్‌ ఆడాడు. దీంతో 7 బంతులు మిగిలుండగానే 259 పరుగుల లక్ష్యాన్ని దక్షిణాఫ్రికా ఛేదించింది. ఈ మ్యాచ్‌లో మొత్తం 35 సిక్సర్లు నమోదయ్యాయి. ఓ టీ20 మ్యాచ్‌లో ఇన్ని సిక్సర్లు బాదడం ఇదే తొలిసారి.