IND vs WI: రోహిత్‌ కెప్టెన్సీకి గావస్కర్‌ ఫిదా.. ఎంత రేటింగ్‌ ఇచ్చాడంటే..?

వెస్టిండీస్‌తో జరిగిన తొలి వన్డేలో టీమ్‌ఇండియా ఆరు వికెట్ల తేడాతో గెలుపొందడంపై మాజీ సారథి, బ్యాటింగ్‌ దిగ్గజం సునీల్‌ గావస్కర్‌ హర్షం వ్యక్తం చేశాడు...

Published : 07 Feb 2022 14:12 IST

ఇంటర్నెట్‌డెస్క్‌: వెస్టిండీస్‌తో జరిగిన తొలి వన్డేలో టీమ్‌ఇండియా ఆరు వికెట్ల తేడాతో గెలుపొందడంపై మాజీ సారథి, బ్యాటింగ్‌ దిగ్గజం సునీల్‌ గావస్కర్‌ హర్షం వ్యక్తం చేశాడు. కెప్టెన్‌గా రోహిత్‌ శర్మ తొలి మ్యాచ్‌లోనే ఆకట్టుకున్నాడని మెచ్చుకున్నాడు. టాస్‌ గెలవడం నుంచి మైదానంలో ఫీల్డింగ్‌ సెట్‌ చేయడం, పరిస్థితులకు అనుగుణంగా నిర్ణయాలు తీసుకోవడం, ఆపై బ్యాటింగ్‌లోనూ అర్ధ శతకం సాధించడం టీమ్‌ఇండియాకు శుభపరిణామం అని పేర్కొన్నాడు. సారథిగా హిట్‌మ్యాన్‌ ఇలాంటి ఆరంభమే కావాలని ఆశిస్తాడని గావస్కర్‌ అభిప్రాయపడ్డాడు. రోహిత్‌ కెప్టెన్సీకి గావస్కర్‌ 10కి 9.99 రేటింగ్‌ ఇచ్చాడు.

విండీస్‌ కెప్టెన్‌ కీరణ్‌ పొలార్డ్‌ టాస్‌ ఓడిపోవడం నుంచీ అన్నీ రోహిత్‌కు కలిసి వచ్చాయని చెప్పాడు. ముఖ్యంగా ఆట జరిగేటప్పుడు పరిస్థితులకు అనుగుణంగా నిర్ణయాలు తీసుకోవడం, సరైన సమయంలో సరైన బౌలర్లను తీసుకురావడం, అవి సానుకూల ఫలితాలు అందివ్వడం లాంటివన్నీ రోహిత్‌కు ఉపయోగపడ్డాయని తెలిపాడు. కాగా, ఇటీవల టీమ్‌ఇండియా దక్షిణాఫ్రికా పర్యటనకు ముందు బీసీసీఐ.. విరాట్‌ కోహ్లీని ఆ బాధ్యతల నుంచి తప్పించగా రోహిత్‌కు పరిమిత ఓవర్ల పగ్గాలు అందజేసింది. అయితే, అతడు ఆ సమయంలో గాయంతో ఇబ్బంది పడటంతో కేఎల్‌ రాహుల్‌ జట్టును నడిపించాడు. కానీ, భారత్‌ సఫారీల చేతుల్లో 0-3 తేడాతో ఓటమిపాలైంది. ఇప్పుడు రోహిత్‌ పూర్తిస్థాయిలో కెప్టెన్సీ చేపట్టిన చారిత్రక (1000వ) మ్యాచ్‌లోనే విజయం సాధించడం జట్టుకు శుభపరిణామమని గావస్కర్‌ అభిప్రాయపడ్డాడు.

Read latest Sports News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts