suresh raina: ఒక్క క్యాచ్‌తో గోల్డెన్‌ డేస్‌ గుర్తుచేసిన రైనా.. వీడియో వైరల్‌

రాయ్‌పుర్‌: టీమ్‌ఇండియా మాజీ ఆల్‌రౌండర్‌ సురేశ్‌ రైనా జోరు ఏమాత్రం తగ్గలేదు. అన్ని ఫార్మాట్లలో ఆటకు రిటైర్మెంట్‌ పలికిన ఈ విధ్వంసక ఆటగాడు ఇండియా లెజెండ్స్‌తో ఆస్ట్రేలియా లెజెండ్స్‌కి మధ్య జరిగిన రోడ్‌ సేఫ్టీ ప్రపంచ సిరీస్‌ 2022  లో మెరుపులు మెరిపించాడు. బుధవారం సాయంత్రం రాయ్‌పుర్‌లోని నారాయణ్‌ సింగ్‌ మైదానంలో జరిగిన తొలి సెమీ ఫైనల్‌ మ్యాచులో రైనా తన ఫీల్డింగ్‌ మాయాజాలాన్ని చూపాడు. 

16వ ఓవర్లో ఆస్ట్రేలియా ఆటగాడు బెన్‌ డంక్‌ తన బ్యాటింగ్‌తో చెలరేగుతూ బౌండరీ కొట్టే ప్రయత్నం చేశాడు. ఆ సమయంలో ఫీల్డింగ్‌లో ఉన్న రైనా రెప్పపాటులో గాల్లోకి ఎగిరి బంతిని క్యాచ్‌ పట్టుకున్నాడు.  ఆ ఒక్క క్యాచ్‌తో స్టేడియం మొత్తం హోరెత్తింది. కెప్టెన్‌ సచిన్‌ తెందూల్కర్‌ సహా సహచర ఆటగాళ్లు రైనాను అభినందిస్తున్న ఈ వీడియో సామాజిక మాధ్యమాల్లో వైరల్‌గా మారింది. గతంలో ఇదే తరహా క్యాచులతో ఆకట్టుకున్న వీడియోలను దీనికి జత చేసి అభిమానులు ట్రెండ్‌ చేస్తున్నారు. 2005లో క్రికెట్‌లోకి అడుగుపెట్టిన ఈ ఆటగాడు చెన్నై జట్టులో ధోనీ తర్వాత ఆ స్థాయి గుర్తింపు తెచ్చుకున్నాడు. ఐపీఎల్‌లో అత్యంత విజయవంతమైన ఆటగాళ్లలో ఒకడిగా పేరుపొందాడు. 204 మ్యాచుల్లో 5,528 పరుగులు చేసి అగ్రస్థానాన్ని అందుకున్నాడు.