Suryakumar yadav: సచిన్‌ వీడియో.. సూర్యకుమార్‌ సరదా కామెంట్‌

దిల్లీ: క్రికెట్‌ దిగ్గజం సచిన్‌ తెందూల్కర్‌(Sachin Tendulkar) పోస్ట్‌ చేసిన వీడియో ఒకటి నెట్టింట వైరల్‌గా మారింది. తన కెరీర్‌ను నిర్మించడంలో తన శ్రీమతి ఎంతటి కీలక పాత్ర పోషించిందో తెలుపుతూ సచిన్‌ ఎన్నో వేదికలపై ఆమెను కొనియాడాడు. వైద్యవిద్యలో గోల్డ్‌ మెడల్‌ సాధించిన అంజలి(Anjali Tendulkar) తన కోసం, పిల్లల కోసం ఆమె భవిష్యత్తును సైతం వదులుకుందంటూ ఆమెపై తన ఆరాధనా భావాన్ని వ్యక్తం చేశాడు.‘‘నేను ఏదైనా పర్యటనల కోసం వెళ్లాల్సి వస్తే అర్జున్‌, సారాను ఎవరు చూసుకుంటారనే దిగులు ఉండేది. కానీ, నా భార్య తన కెరీర్‌ను కుటుంబం కోసం త్యాగం చేసింది. తను లేకపోతే నేను కచ్చితంగా ఈ స్థాయిని అందుకునేవాడిని కాదు’’ అంటూ సచిన్‌ ఓ ఇంటర్వ్యూ సందర్భంగా తెలిపాడు. ఇదిలా ఉంటే గురువారం ఈ జంట సరదాగా పోస్ట్‌ చేసిన ఓ వీడియో అభిమానులను ఆకట్టుకుంటోంది. టీమ్‌ఇండియా బ్యాటర్‌ సూర్యకుమార్‌(Suryakumar Yadav) ఈ వీడియోపై ఓ సరదా కామెంట్ చేశాడు. 

‘‘ఎప్పుడు ఎవరిని కలవాల్సి వస్తుందో తెలుసుకోలేం’’ అని రాసి ఉన్న ప్లేట్‌ను సచిన్‌ చూపుతుండగా అందుకు అంజలి ఓ చిరునవ్వును విసురుతుంది. ఈ వీడియోకు రెండు మిలియన్లకు పైగా లైకులు వచ్చాయి. క్రికెటర్లు యువరాజ్‌సింగ్‌, సురేశ్‌ రైనాలు ఈ పోస్ట్‌కు లవ్‌ గుర్తును కామెంట్‌ చేశారు. మిస్టర్‌ 360 ఈ వీడియోపై స్పందిస్తూ.. ‘‘నాన్‌ స్ట్రైకర్‌ ఎండ్‌ నుంచి వచ్చిన స్పందన అద్భుతంగా ఉంది’’ అంటూ ఎమోజీని జతచేశాడు.