Hyderabad vs Lucknow : లఖ్‌నవూ ఖాతాలో మరో విజయం.. హైదరాబాద్‌కి వరుసగా రెండో ఓటమి..

ఇంటర్నెట్ డెస్క్‌ : టీ20 మెగా టోర్నీలో లఖ్‌నవూ మరో విజయం సాధించింది. హైదరాబాద్‌తో జరిగిన మ్యాచులో 12 పరుగుల తేడాతో గెలుపొందింది. 170 పరుగుల లక్ష్యంతో ఛేదనకు దిగిన హైదరాబాద్‌ నిర్ణీత ఓవర్లలో 157/9 స్కోరుకే పరిమితమైంది. లఖ్‌నవూకిది రెండో విజయం కాగా.. హైదరాబాద్‌కిది వరుసగా రెండో ఓటమి కావడం గమనార్హం. హైదరాబాద్‌ బ్యాటర్లలో రాహుల్ త్రిపాఠి (44 : 30 బంతుల్లో 5×4, 1×6), నికోలస్‌ పూరన్‌ (34 : 24 బంతుల్లో 3×4, 2×6) రాణించారు. వాషింగ్టన్‌ సుందర్‌ (18), కెప్టెన్ కేన్ విలియమ్సన్‌ (16), ఓపెనర్‌ అభిషేక్‌ శర్మ (13), మార్‌క్రమ్‌ (12) పరుగులు చేశారు. భువనేశ్వర్‌ కుమార్‌ (1) పరుగు చేయగా..  అబ్దుల్ సమద్‌ (0) డకౌటయ్యాడు. ఆఖరు బంతికి రోమెరియో షెఫర్డ్‌ (8) క్యాచ్‌ ఔటయ్యాడు. లఖ్‌నవూ బౌలర్లలో అవేశ్‌ ఖాన్‌ నాలుగు, జేసన్‌ హోల్డర్‌ మూడు, కృనాల్ పాండ్య రెండు వికెట్లు పడగొట్టారు. 

నిలకడగా హైదరాబాద్ బ్యాటింగ్‌..

కృనాల్ పాండ్య వేసిన 14వ ఓవర్లో తొలి బంతికి రాహుల్ త్రిపాఠి (44).. రవి బిష్ణోయ్‌కి చిక్కాడు. ఐదో బంతిని నికోలస్‌ పూరన్ (21) సిక్స్‌గా మలిచాడు. అంతకు ముందు 11వ ఓవర్లో కృనాల్ ఒక వికెట్ పడగొట్టి ఒక పరుగు ఇవ్వగా.. ఆ తర్వాతి ఓవర్లో 8 పరుగులు వచ్చాయి. 13వ ఓవర్లో రవి బిష్ణోయ్ నాలుగు పరుగులు ఇచ్చాడు. జేసన్ హోల్డర్‌ వేసిన 15వ ఓవర్లో రెండు ఫోర్లు సహా 15 పరుగులు వచ్చాయి. వాషింగ్టన్‌ సుందర్‌ (6) క్రీజులో ఉన్నాడు. దీంతో 15 ఓవర్లకు హైదరాబాద్‌ 120/4 స్కోరుతో నిలిచింది. హైదరాబాద్‌ విజయానికి ఇంకా 50 పరుగులు కావాల్సి ఉంది.

మరో వికెట్ కోల్పోయిన హైదరాబాద్‌.. 

హైదరాబాద్‌ మరో కీలక వికెట్ కోల్పోయింది. 10.1 బంతికి మార్‌క్రమ్‌ (12) రాహుల్‌కి చిక్కి క్రీజు వీడాడు. అంతకు ముందు, రవి బిష్ణోయ్‌ వేసిన ఏడో ఓవర్లో ఓ ఫోర్ బాదిన రాహుల్ త్రిపాఠి (35).. ఆండ్రూ టై వేసిన ఆ తర్వాతి ఓవర్లో మూడు ఫోర్లు బాదాడు. కృనాల్ పాండ్య వేసిన తొమ్మిదో ఓవర్లో రెండో బంతిని రాహుల్ సిక్స్‌గా మలిచాడు. పదో ఓవర్లో ఐదు పరుగులు వచ్చాయి. దీంతో 10.1 ఓవర్లు పూర్తయ్యే సరికి హైదరాబాద్‌ 82/3 స్కోరుతో నిలిచింది. 

పవర్‌ ప్లే పూర్తి.. కీలక వికెట్లు కోల్పోయిన హైదరాబాద్‌..

పవర్‌ ప్లే పూర్తయ్యే సరికి హైదరాబాద్‌ రెండు వికెట్లు కోల్పోయి 40 పరుగులు చేసింది. లఖ్‌నవూ బౌలర్‌ అవేశ్‌ ఖాన్‌ రెండు వికెట్లు పడగొట్టాడు. నాలుగో ఓవర్లో మూడో బంతికి కెప్టెన్ కేన్ విలియమ్సన్‌ (16) ఆండ్రూ టైకి చిక్కి క్రీజు వీడగా.. ఆరో ఓవర్లో తొలి బంతికి మరో ఓపెనర్‌ అభిషేక్‌ శర్మ (13).. మనీశ్ పాండేకు క్యాచ్‌ ఇచ్చాడు.  ప్రస్తుతం రాహుల్ త్రిపాఠి (5), మార్‌క్రమ్‌ (1) క్రీజులో ఉన్నారు.

ఛేదనకు దిగిన హైదరాబాద్‌ బ్యాటర్లు.. 

హైదరాబాద్‌ బ్యాటర్లు ఛేదనకు దిగారు. జేసన్‌ హోల్డర్‌ వేసిన తొలి ఓవర్లో ఆఖరు బంతిని ఓపెనర్‌ అభిషేక్‌ శర్మ (8) బౌండరీకి తరలించాడు. కృనాల్ పాండ్య వేసిన రెండో ఓవర్లో ఐదే పరుగులు ఇచ్చాడు. మూడో ఓవర్లో నాలుగో బంతిని కెప్టెన్ కేన్ విలియమ్సన్‌ (12) సిక్స్‌గా మలిచాడు. దీంతో మూడు ఓవర్లకు హైదరాబాద్‌ వికెట్ నష్టపోకుండా 21 పరుగులు చేసింది.

 లఖ్‌నవూ బ్యాటింగ్‌ పూర్తి.. రాణించిన రాహుల్, దీపక్‌ హుడా.. హైదరాబాద్‌ లక్ష్యం ఎంతంటే.?

టాస్‌ ఓడి బ్యాటింగ్‌కు దిగిన లఖ్‌నవూ జట్టుకు ఆరంభంలోనే హైదరాబాద్ బౌలర్లు వరుస షాకులిచ్చారు. దీంతో పవర్‌ ప్లేలోనే లఖ్‌నవూ మూడు వికెట్లు కోల్పోయింది. అయినా కెప్టెన్‌ కేఎల్ రాహుల్ (68 : 50 బంతుల్లో 6×4, 1×6), దీపక్‌ హుడా (51 : 33 బంతుల్లో 3×4, 3×6) అర్ధ శతకాలతో రాణించడంతో లఖ్‌నవూ నిర్ణీత ఓవర్లలో ఏడు వికెట్లు కోల్పోయి 169 పరుగులు చేసింది. హైదరాబాద్‌ ముందు 170 పరుగుల లక్ష్యాన్ని నిర్దేశించింది. లఖ్‌నవూ బ్యాటర్లలో క్వింటన్‌ డి కాక్‌ (1), ఎవిన్‌ లూయిస్‌ (1), మనీశ్ పాండే (11), కృనాల్ పాండ్య (6) విఫలమయ్యారు. ఆఖరు బంతికి ఆయుష్ బదోని (19) రనౌటయ్యాడు. జేసన్‌ హోల్డర్‌ (8) నాటౌట్‌గా నిలిచాడు. హైదరాబాద్‌ బౌలర్లలో వాషింగ్టన్‌ సుందర్, రొమెరియో షెఫర్డ్,  నటరాజన్‌ తలో రెండు వికెట్లు పడగొట్టారు.

వేగం పెంచిన లఖ్‌నవూ బ్యాటర్లు..

క్రీజులో కుదురుకున్న లఖ్‌నవూ ఆటగాళ్లు బ్యాట్లు ఝుళిపిస్తున్నారు. నటరాజన్‌ వేసిన 11వ ఓవర్లో 8 పరుగులు ఇవ్వగా.. రొమెరియో షెఫర్డ్ వేసిన తర్వాతి ఓవర్లో తొలి బంతికి దీపక్‌ హుడా సిక్స్ బాదాడు. 13వ ఓవర్లో భువనేశ్వర్‌ ఏడే పరుగులు ఇచ్చాడు. ఉమ్రాన్ మాలిక్ వేసిన తర్వాతి ఓవర్లో దీపక్‌ హుడా మరో రెండు ఫోర్లు, ఓ సిక్స్ బాదాడు. దీంతో ఈ ఒక్క ఓవర్లోనే 16 పరుగులు వచ్చాయి. ఆ తర్వాత నటరాజన్‌ వేసిన 15వ ఓవర్లో మూడో బంతికి సింగిల్ తీసిన దీపక్‌ హుడా (51) అర్ధ శతకం పూర్తి చేసుకున్నాడు. కెప్టెన్‌ కేఎల్‌ రాహుల్‌ (49) క్రీజులో ఉన్నాడు. దీంతో 15 ఓవర్లకు లఖ్‌నవూ మూడు వికెట్లు కోల్పోయి 114 పరుగులు చేసింది.

కట్టుదిట్టంగా హైదరాబాద్‌ బౌలింగ్‌.. నిలకడగా లఖ్‌నవూ బ్యాటింగ్‌..

పవర్‌ ప్లేలోనే కీలక వికెట్లు కోల్పోవడంతో లఖ్‌నవూ ఆటగాళ్లు వికెట్ కాపాడుకుంటూ జాగ్రత్తగా ఆడుతున్నారు. ఉమ్రాన్‌ మాలిక్ వేసిన ఏడో ఓవర్లో మూడు పరుగులు ఇవ్వగా.. అబ్దుల్ సమద్‌ వేసిన ఆ తర్వాతి ఓవర్లో తొలి బంతిని కేఎల్ రాహుల్ బౌండరీకి తరలించాడు. నటరాజన్‌ వేసిన తొమ్మిదో ఓవర్లో ఐదు పరుగులు వచ్చాయి. ఉమ్రాన్‌ వేసిన పదో ఓవర్లో దీపక్‌ హుడా (20) ఓ ఫోర్ బాదగా.. కేఎల్‌ రాహుల్ (41) రెండు ఫోర్లు, ఓ సిక్స్‌ బాదాడు. దీంతో 10 ఓవర్లు పూర్తయ్యే సరికి లఖ్‌నవూ 68/3 స్కోరుతో నిలిచింది.

పవర్‌ ప్లేలోనే కీలక వికెట్లు కోల్పోయిన లఖ్‌నవూ..

పవర్‌ ప్లే పూర్తయ్యే సరికి లఖ్‌నవూ మూడు వికెట్లు కోల్పోయి 32 పరుగులు చేసింది. వాష్టింగ్టన్‌ సుందర్‌ వేసిన నాలుగో ఓవర్లో తొలి బంతికి ఎవిన్ లూయిస్‌ (1).. ఎల్బీగా వెనుదిరిగాడు. రొమెరియో షెఫర్డ్ వేసిన తర్వాతి ఓవర్లో వరుసగా ఓ ఫోర్, ఓ సిక్స్ బాదిన మనీశ్ పాండే (11).. అదే ఊపులో ఐదో బంతిని కూడా బౌండరీకి తరలించే క్రమంలో భువనేశ్వర్ కుమార్‌కి చిక్కాడు. ఆరో ఓవర్లో ఐదు పరుగులు వచ్చాయి. కెప్టెన్ కేఎల్‌ రాహుల్‌ (17), దీపక్‌ హుడా (2) క్రీజులో ఉన్నారు.  

కట్టుదిట్టంగా హైదరాబాద్‌ బౌలింగ్‌..

హైదరాబాద్‌ బౌలర్లు కట్టుదిట్టంగా బంతులేస్తున్నారు. దీంతో మూడు ఓవర్లు పూర్తయ్యే సరికి లఖ్‌నవూ ఒక వికెట్‌ కోల్పోయి 16 పరుగులు చేసింది. భువనేశ్వర్‌ కుమార్‌ వేసిన తొలి ఓవర్లో మూడే పరుగులు ఇచ్చాడు. వాషింగ్టన్ సుందర్‌ వేసిన రెండో ఓవర్లో తొలి బంతిని కెప్టెన్ కేఎల్‌ రాహుల్ (14) బౌండరీకి తరలించాడు. ఇదే ఓవర్లో నాలుగో బంతికి ఓపెనర్‌ క్వింటన్ డి కాక్‌ (1).. కేన్‌ విలియమ్సన్‌కి చిక్కి క్రీజు వీడాడు. మూడో ఓవర్లో ఎనిమిది పరుగులు వచ్చాయి. ఎవిన్‌ లూయిస్‌ (1) క్రీజులో ఉన్నాడు.   

టాస్ నెగ్గిన విలియమ్సన్.. హైదరాబాద్‌ బోణీ కొట్టేనా.?

టీ20 మెగా టోర్నీలో భాగంగా మరి కాసేపట్లో హైదరాబాద్‌, లఖ్‌నవూ జట్లు తలపడనున్నాయి. టాస్ గెలిచిన విలియమ్సన్‌ బౌలింగ్‌ ఎంచుకున్నాడు. లఖ్‌నవూకి బ్యాటింగ్‌ అప్పగించాడు. ఇప్పటి వరకు రెండు మ్యాచులు ఆడిన లఖ్‌నవూ జట్టు.. గుజరాత్‌తో జరిగిన తొలి మ్యాచులో ఓటమి పాలైంది. ఆ తర్వాత చెన్నైతో జరిగిన రెండో మ్యాచులో విజయాన్ని అందుకుంది. తాజాగా, హైదరాబాద్‌తో పోరుకు సిద్ధమైంది. మరోవైపు, రాజస్థాన్‌తో జరిగిన తొలి మ్యాచులో పరాజయం పాలైన హైదరాబాద్‌ జట్టు.. ఈ మ్యాచులోనైనా బోణీ కొడుతుందేమో చూడాలి. ముంబయిలోని డీవై పాటిల్ స్టేడియం వేదికగా ఈ మ్యాచు జరుగనుంది.

తుది జట్ల వివరాలు..

హైదరాబాద్‌ : కేన్‌ విలియమ్సన్‌ (కెప్టెన్‌), అభిషేక్ శర్మ, రాహుల్‌ త్రిపాఠి, మార్‌క్రమ్, నికోలస్‌ పూరన్‌ (వికెట్‌ కీపర్‌), అబ్దుల్‌ సమద్‌, వాషింగ్టన్‌ సుందర్‌, రొమెరియో షెఫర్డ్‌, భువనేశ్వర్‌ కుమార్, టి. నటరాజన్‌, ఉమ్రాన్ మాలిక్

లఖ్‌నవూ : కేఎల్‌ రాహుల్ (కెప్టెన్‌), క్వింటన్‌ డి కాక్‌ (వికెట్ కీపర్‌), మనీశ్ పాండే, ఎవిన్‌ లూయిస్, దీపక్‌ హుడా, ఆయుష్‌ బదోని, కృనాల్‌ పాండ్య, జేసన్‌ హోల్డర్‌, రవి బిష్ణోయ్‌, ఆండ్రూ టై, అవేశ్‌ ఖాన్‌