IND vs SA: దంచికొట్టిన బ్యాటర్లు.. టీమ్‌ఇండియా ఘన విజయం

ఇంటర్నెట్‌ డెస్క్‌: దక్షిణాఫ్రికాతో జరుగుతున్న రెండో వన్డేలో భారత్‌ ఘన విజయం సాధించింది. 279 పరుగుల లక్ష్యాన్ని భారత్‌ మూడు వికెట్లు మాత్రమే కోల్పోయి ఛేదించింది. శ్రేయస్‌ అయ్యర్‌ (113*) సెంచరీతో చెలరేగాడు. ఓపెనర్లు శిఖర్ ధావన్‌ (13),  శుభ్‌మన్ గిల్ (28) స్వల్ప స్కోర్లకే ఔటైనప్పటికీ.. శ్రేయస్‌ అయ్యర్‌-ఇషాన్‌ కిషన్‌ జోడీ అద్భుతంగా రాణించింది. నిలకడగా బ్యాటింగ్‌ చేస్తూ ఈ ఇద్దరూ ఇన్నింగ్స్‌ను చక్కదిద్దారు. ఆపై కుదురుకున్నాక చెలరేగిపోయారు. ముఖ్యంగా ఇషాన్‌ సిక్సర్లతో విరుచుకుపడ్డాడు. ఇషాన్‌ కిషన్‌ 93 పరుగుల వద్ద ఔటై సెంచరీ మిస్సయినప్పటికీ.. అయ్యర్‌ (113*) శతకం బాదాడు. శాంసన్‌తో (30*) జట్టుకట్టి టీమ్‌ఇండియాను విజయ తీరాలకు చేర్చాడు. శ్రేయస్‌కు వన్డేల్లో ఇది రెండో సెంచరీ కావడం విశేషం.

అంతకుముందు సఫారీ జట్టు బ్యాటర్లు ఐదెన్ మార్‌క్రమ్‌ (79), రీజా హెండ్రిక్స్‌ (74) రాణించి భారత్‌ ముందు మెరుగైన లక్ష్యాన్ని ఉంచారు. ఈ ఇద్దరి దూకుడు చూస్తే ఆ జట్టు 300లకు పైగా స్కోరు చేస్తుందని అందరూ భావించారు. అయితే, బౌలర్లు విజృంభించడంతో ఆ జట్టు స్పల్ప వ్యవధిలో వికెట్లు కోల్పోయి 278 స్కోరుకే పరిమితమైంది. భారత బౌలర్లలో సిరాజ్‌ 3 వికెట్లతో రాణించాడు. సుందర్‌, షహబాజ్, కుల్‌దీప్‌ యాదవ్, శార్దూల్‌కు తలో వికెట్‌ దక్కింది. దీంతో మూడు వన్డేల సిరీస్‌లో ఇరు జట్లు 1-1తో నిలిచాయి. నిర్ణయాత్మక మూడో మ్యాచ్‌ దిల్లీలోని ఫిరోజ్‌షా కోట్లా మైదానంలో ఈనెల 11న (మంగళవారం) జరగనుంది.