T20 Cricket: రాజస్థాన్‌ భళా.. చెన్నైవిలవిల.. ఇంకా ఆ మూడు జట్లే ‘200’ కొట్టలేదు

(Photos: Sanju, Jadeja Instagram)

టీ20 క్రికెట్‌లో పరుగులు వరద పారితేనే చూసే అభిమానులకు ఉత్సాహంగా ఉంటుంది. ఈ మధ్య కాలంలో 180, 190 స్కోర్లు సాధారణంగా మారిపోయాయి. ఇక 200 పైచిలుకు పరుగులు కూడా ఒక్కోసారి తక్కువవుతున్నాయి. ప్రత్యర్థులు ధనాధన్ బ్యాటింగ్‌తో వాటినీ ఛేదించేస్తున్నారు. అలా ఈ సీజన్‌లో ఇప్పటివరకు 200 పరుగులకుపైగా సాధించిన జట్లేవంటే..

ఇప్పటివరకు ఈ సీజన్‌లో మొత్తం ఏడు జట్లు 200కు పైగా స్కోర్లు సాధించాయి. అందులో రాజస్థాన్‌, చెన్నై చెరో రెండో సార్లు సాధించగా.. బెంగళూరు, పంజాబ్‌, లఖ్‌నవూ, దిల్లీ, కోల్‌కతా జట్లు ఒక్కోసారి ఈ భారీ స్కోర్లు చేశాయి. ఇక్కడ రెండొందల మార్క్‌ చేరుకోనిది గుజరాత్‌, హైదరాబాద్‌, ముంబయి మాత్రమే.

* బెంగళూరుకు షాకే: ఈ సీజన్‌లో బెంగళూరు ఆడిన తన తొలి మ్యాచ్‌లోనే 205/2 పరుగుల భారీస్కోర్‌ చేసింది. దాన్ని పంజాబ్‌ ఐదు వికెట్లు కోల్పోయి 19 ఓవర్లలో ఛేదించి విజయం సాధించింది. ఈ మ్యాచ్‌లో టాప్‌ స్కోరర్‌ బెంగళూరు కెప్టెన్‌ ఫా డుప్లెసిస్‌ (88; 57 బంతుల్లో 3x4, 7x6) దంచికొట్టాడు. ఛేదనలో పంజాబ్‌ బ్యాటర్లు ధావన్‌ (43), రాజపక్స (43), షారుఖ్‌ ఖాన్‌ (24*), ఒడియన్‌ స్మిత్‌ (25) తలా ఓ చేయి వేయడంతో ఆ జట్టు తేలిగ్గా గెలిచింది.

(Photo: Sanju Samson Instagram)

* రాజస్థాన్‌ రెండోసారి: రాజస్థాన్‌ ఈ సీజన్‌లో రెండుసార్లు 200 పైచిలుకు పరుగులు చేసింది. రెండింటిలోనూ ప్రత్యర్థులను కట్టడి చేసి విజయం సాధించడం విశేషం. తొలుత హైదరాబాద్‌తో ఆడిన మ్యాచ్‌లో 210/6 భారీ స్కోర్‌ చేయగా.. ఛేదనలో విలియమ్సన్‌ టీమ్‌ 149/7కే చేతులెత్తేసింది. ఇక ఇటీవలే కోల్‌కతాపై 217/5 మరోసారి రెండొందల స్కోర్‌ దాటడమే కాకుండా ఈ సీజన్‌లో ఇప్పటివరకు అత్యధిక స్కోర్‌ నమోదు చేసిన జట్టుగా నిలిచింది. ఈ మ్యాచ్‌లో కోల్‌కతా గట్టి పోటీనిచ్చి గెలిచేలా కనిపించింది. కానీ, చివర్లో కట్టుదిట్టంగా బంతులేసి రాజస్థాన్‌ ఆ జట్టును 210 పరుగులకు ఆలౌట్‌ చేసింది.

(Photo: Ravindra Jadeja Instagram)

* అయ్యో చెన్నై: లఖ్‌నవూతో తన రెండో మ్యాచ్‌ ఆడిన చెన్నై మొదట బ్యాటింగ్‌ చేసి 210/7 పరుగుల భారీ స్కోర్‌ చేసింది. ఛేదనలో కేఎల్ రాహుల్‌ టీమ్‌ దంచికొట్టడంతో 19.3 ఓవర్లలోనే నాలుగు వికెట్లు కోల్పోయి విజయం సాధించింది. ఇక రెండోసారి బెంగళూరుతో ఆడిన మ్యాచ్‌లోనూ 216/4 భారీ స్కోర్‌ నమోదు చేయగా.. ఛేదనలో బెంగళూరు గట్టిగానే ప్రయత్నించింది. కానీ, చివరికి 193/9 స్కోర్‌ వద్దే నిలిచిపోయి ఓటమిపాలైంది. దీంతో చెన్నై ఈ సీజన్‌లో రెండు మ్యాచ్‌ల్లో భారీ పరుగులు చేసినా ఒక విజయం, ఒక ఓటమిని తన ఖాతాలో వేసుకుంది.

(Photo: Rishabh Pant Instagram)

* దిల్లీ మెరుపులు: దిల్లీ ఈ సీజన్‌లో ఒకేసారి 200 పరుగులకు పైగా స్కోర్‌ చేసింది. అదీ కోల్‌కతాతో తలపడిన మ్యాచ్‌లో ఓపెనర్లు పృథ్వీ షా (51), డేవిడ్‌ వార్నర్‌ (61) దంచికొట్టడంతో 215/5 స్కోర్‌ సాధించింది. ఇక ఛేదనలో కోల్‌కతా కెప్టెన్‌ శ్రేయస్‌ అయ్యర్‌ (54) రాణించినా మిగతా బ్యాటర్లు విఫలమవడంతో ఆ జట్టు 171 పరుగులకే ఆలౌటైంది. దీంతో దిల్లీ ఈ మ్యాచ్‌లో 44 పరుగుల తేడాతో ఘన విజయం సాధించింది.

- ఇంటర్నెట్‌డెస్క్‌ ప్రత్యేకం..