Anil Kumble: సాంకేతికత పెరుగుతోంది.. క్రీడల్లో ఓటీటీలు వస్తాయి: కుంబ్లే

ఇంటర్నెట్‌డెస్క్‌: ప్రస్తుత ప్రపంచంలో సాంకేతికత భారీగా పెరుగుతుందని, తద్వారా క్రికెట్‌లో అనూహ్య మార్పులు చోటుచేసుకుంటాయని స్పిన్‌ దిగ్గజం అనిల్‌ కుంబ్లే అన్నారు. భవిష్యత్లో డీఆర్‌ఎస్‌ (డెసిషన్‌ రివ్యూ సిస్టమ్‌) విధానంలో మరిన్ని మార్పులు సంభవిస్తాయన్నారు. అదే జరిగితే ఏ క్రీడాకారుడూ ‘డేటా ఇంటిలిజెన్స్‌’ను కొట్టిపారేయలేడని కుంబ్లే పేర్కొన్నారు. ఓ యూనివర్శిటీ ఏర్పాటు చేసిన ‘బిల్డింగ్‌ కాంపిటిటివ్‌ అడ్వాంటేజ్‌ త్రూ స్పోర్ట్స్‌ అనలిటిక్స్‌ అండ్‌ డేటా ఇంటెలిజెన్స్‌’ అనే కార్యక్రమంలో పాల్గొన్న మాజీ స్పిన్నర్‌ ఈ వ్యాఖ్యలు చేశారు. క్రికెట్‌లో ఇప్పటికే డీఆర్‌ఎస్‌ విధానం అమలు చేస్తున్నారని, అది ఆటపై తీవ్ర ప్రభావం చూపుతోందని చెప్పారు. ఈ టెక్నాలజీ మున్ముందు మరింత కొత్త పుంతలు తొక్కుతుందన్నారు. ఆటగాళ్లు ఈ మార్పులను ఆహ్వానిస్తే బాగుంటుందని లేకపోతే వెనుకపడిపోతారని ఆయన పేర్కొన్నారు.

క్రికెట్‌లో సాంకేతికత అంశాలపై భిన్నాభిప్రాయాలు వ్యక్తమైనా అది ఆటకు మంచి చేస్తుందని, అందుకే అది ఆహ్వానించదగ్గ విషయమని తెలిపారు. ఈ క్రమంలోనే క్రీడల్లోనూ ఓటీటీలు వస్తాయని పేర్కొన్నారు. ఇకపై టీవీలు, ప్రసారదారుల ప్రభావం అధికంగా ఉండదన్నారు. క్రీడా సమాఖ్యలు సైతం ప్రజలకు చేరువ అయ్యేందుకు సాంకేతికతను విరివిగా ఉపయోగించుకుంటారని అభిప్రాయపడ్డారు. ఆటలను ప్రజలకు చేరువ చేసేందుకు ఇన్ని రోజులు టీవీలు ఆ పాత్ర పోషించాయని, ఇకపై ఓటీటీలు వస్తాయని కుంబ్లే వివరించారు. ఈ మార్పుల కోసం తాను ఎదురుచూస్తున్నట్లు స్పష్టం చేశారు. మరోవైపు క్రికెట్‌లో పరిమిత ఓవర్ల ఫార్మాట్లు పెరిగేకొద్దీ ‘డేటా ఇంటిలిజెన్స్‌’ అధికమవుతుందని అంచనా వేశారు. ఆటలు ఎంత చిన్నగా మారితే డేటా ఇంటిలెజెన్స్ వినియోగం అంత ఎక్కువగా ఉంటుందని కుంబ్లే వివరించారు.