Virat Kohli: దక్షిణాఫ్రికా పర్యటనలో కొత్త ట్విస్ట్‌.. వన్డేలకు కోహ్లీ దూరం!

ఇంటర్నెట్‌డెస్క్‌: టీమ్‌ఇండియా దక్షిణాఫ్రికా పర్యటనకు సంబంధించి కొత్త ట్విస్ట్‌. ఈనెల 26 నుంచి ఇరు జట్ల మధ్య మూడు టెస్టుల సిరీస్‌ ప్రారంభమవుతుండగా.. ఆ తర్వాత జనవరి 19 నుంచి 23 వరకు మూడు వన్డేల సిరీస్‌ జరగనుంది. అయితే, ఇటీవల ఈ పర్యటనకు సంబంధించి జట్టును ఎంపిక చేసినప్పుడు భారత సెలెక్షన్‌ కమిటీ విరాట్‌ కోహ్లీని వన్డే కెప్టెన్‌గా తొలగించిన సంగతి తెలిసిందే. రోహిత్‌ శర్మకు ఆ బాధ్యతలు అప్పగించింది.

మరోవైపు రోహిత్‌ ఆదివారం ప్రాక్టీస్‌ సెషన్‌లో తొడ కండరాల గాయం బారిన పడటంతో మూడు టెస్టుల సిరీస్‌కు దూరమయ్యాడని బీసీసీఐ సోమవారం ప్రకటించింది. ఈ క్రమంలోనే అతడి స్థానంలో ప్రియాంక్‌ పాంచాల్‌ను ఎంపిక చేసినట్లు వెల్లడించింది. ఈ విషయం పక్కనపెడితే, ఇప్పుడు విరాట్‌ కోహ్లీ జట్టుకు కొత్త ట్విస్ట్‌ ఇచ్చాడని తెలిసింది. దక్షిణాఫ్రికా పర్యటనలో అతడు వన్డే మ్యాచ్‌లకు దూరం కానున్నట్లు సమాచారం. మంగళవారం ఈ మేరకు ఓ అధికారి వెల్లడించినట్లు తెలుస్తోంది. అయితే, ఆ సమయానికల్లా రోహిత్‌ కోలుకుంటాడని ఆయన ఆశాభావం వ్యక్తం చేశాడు. దీంతో యథావిధిగా రోహిత్‌ వన్డే మ్యాచ్‌లకు నాయకత్వం వహిస్తాడని ఆ అధికారి వెల్లడించాడు. అయితే ఈ విషయంపై స్పష్టత రావాల్సి ఉంది.