IPL 2021: ఐపీఎల్‌ నియమావళి ఉల్లంఘన.. దినేశ్‌ కార్తీక్‌కు మందలింపు

ఇంటర్నెట్‌డెస్క్‌: కోల్‌కతా నైట్‌ రైడర్స్‌ బ్యాట్స్‌మన్‌ దినేశ్‌ కార్తీక్‌ మందలింపునకు గురయ్యాడు. అతడు ఐపీఎల్‌ నియమావళి ఉల్లంఘించాడని పేర్కొంటూ టోర్నీ నిర్వహకులు బుధవారం రాత్రి ఓ ప్రకటన విడుదల చేశారు. అయితే, అందులో అతడేం చేశాడ విషయం మాత్రం వెల్లడించలేదు. గతరాత్రి దిల్లీ క్యాపిటల్స్‌తో క్వాలిఫయర్‌-2 మ్యాచ్‌లో తలపడిన సందర్భంగా కార్తీక్‌ (0) ఛేదనలో డకౌటైనప్పుడు తన కోపాన్ని వికెట్లపై చూపించాడని సమాచారం. ఈ నేపథ్యంలోనే ‘ఐపీఎల్‌ కోడ్‌ ఆఫ్ కండక్ట్‌’ కింద తప్పు చేసినట్లు ఆంగీకరించాడని నిర్వహకులు తెలిపారు. అతడిపై మ్యాచ్‌ రిఫరీ తీసుకునే చర్యలు అంతిమం అని అందులో పేర్కొన్నారు.

ఈ మ్యాచ్‌లో దిల్లీ నిర్దేశించిన 136 పరుగుల స్వల్ప లక్ష్యాన్ని కోల్‌కతా మొదట తెలిగ్గా ఛేదించేలా కనిపించింది. 16 ఓవర్లకు 123/2 స్కోర్‌తో నిలిచి విజయానికి 13 పరుగుల దూరంలో నిలిచింది. అయితే, ఒక్కసారిగా పరిస్థితులు మారిపోయాయి. అప్పటికి శుభ్‌మన్‌ గిల్ ‌(45), రాహుల్‌ త్రిపాఠి క్రీజులో ఉన్నారు. ఇక తర్వాత అవేశ్‌ఖాన్‌, రబాడ, నార్జె తర్వాతి మూడు ఓవర్లు కట్టుదిట్టంగా బంతులేసి 6 పరుగులే ఇచ్చి మూడు వికెట్లు తీశారు. గిల్(46), కార్తీక్‌ (0), మోర్గాన్‌ (0) ఔటయ్యారు. చివరి ఓవర్‌లో అశ్విన్‌ షకిబ్‌ (0), నరైన్‌ (0)ను కూడా పెవిలియన్‌ చేరడంతో ఆఖరి రెండు బంతుల్లో కోల్‌కతా విజయానికి 6 పరుగులు అవసరమయ్యాయి. ఈ క్రమంలోనే ఐదో బంతిని రాహుల్‌ త్రిపాఠి (12) స్టాండ్స్‌లోకి తరలించి మ్యాచ్‌ను గెలిపించాడు. ఈ క్రమంలోనే కార్తీక్‌ ఔటైనప్పుడు వికెట్లను తీసి పారేశాడు.