PM Modi with Paralympic contingent: ప్రధాని మోదీకి పారా అథ్లెట్ల బహుమతి

(Photo: Anurag Thakur Twitter)

ఇంటర్నెట్‌డెస్క్‌: టోక్యో పారాలింపిక్స్‌లో అత్యధికంగా 19 పతకాలతో సరికొత్త చరిత్ర సృష్టించిన భారత పారా అథ్లెట్ల బృందాన్ని ప్రధాని నరేంద్ర మోదీ అభినందించారు. గురువారం ఉదయం తన నివాసంలో ఏర్పాటు చేసిన ప్రత్యేక అల్పాహారవిందులో అథ్లెట్లందరినీ తమ కోచ్‌లతో సహా కలిశారు. ఈ సందర్భంగా పతక విజేతలు ఓ తెల్లటి శాలువాపై సంతకాలు చేసి మోదీకి బహుమతిగా అందజేశారు. దాన్నీ ఆయన మెడలో వేసుకొని అథ్లెట్లతో సంతోషంగా గడిపారు. అథ్లెట్లు తమ జీవితాల్లో ఎదురైన ఎన్నో కష్టనష్టాలకోర్చి ఇలా పతకాలు సాధించడం గొప్ప విశేషమని కొనియాడారు.

ఈ పారా అథ్లెట్ల విజయాలు దేశంలోని క్రీడాకారులకు స్ఫూర్తి కలిగిస్తాయని, ఇప్పుడిప్పుడే క్రీడాకారులుగా ఎదగాలని చూస్తున్నవారికి ప్రేరణగా నిలుస్తాయని మోదీ అన్నారు. పారాలింపిక్స్‌లో పతకాలు సాధించిన వారి క్రీడా పరికరాలు, కిట్లను వేలం వేయనున్నట్లు తెలిపారు. ఈ క్రీడాకారుల శక్తి సామర్థ్యాలు మెచ్చుకోదగినవని పేర్కొన్నారు. అలాగే ఇందులో పతకాలు గెలవని వారిని ఉద్దేశిస్తూ.. నిజమైన క్రీడాకారులెవరూ ఓటములు, వైఫల్యాలు చూసి కుంగిపోరని.. ఎల్లప్పుడూ ముందుకు సాగుతారని మోదీ స్ఫూర్తి నింపారు. కాగా, ఈ కార్యక్రమంలో క్రీడాశాఖ మంత్రి అనురాగ్‌ ఠాకూర్‌, న్యాయశాఖ మంత్రి కిరణ్‌ రిజిజు పాల్గొన్నారు.