రాజస్థాన్‌ రాయల్స్‌కు ఊహించని పరిణామం.. ఐపీఎల్‌కు జోస్‌ బట్లర్‌ దూరం

ఇంటర్నెట్‌డెస్క్‌: వచ్చేనెల జరిగే ఐపీఎల్‌ 2021 మిగతా సీజన్‌లో రాజస్థాన్‌ రాయల్స్‌కు గట్టి ఎదురుదెబ్బ తగిలింది. ఆ జట్టు ప్రధాన బ్యాట్స్‌మన్‌ జోస్‌ బట్లర్‌ మిగతా సీజన్‌కు దూరమయ్యాడు. ఈ విషయాన్ని స్వయంగా రాజస్థాన్‌ రాయల్స్‌ జట్టే ట్విటర్‌లో అభిమానులతో పంచుకుంది. బట్లర్‌ సతీమణి లూయిస్‌ త్వరలో రెండో బిడ్డకు జన్మనివ్వబోతున్నారని, అందుకోసమే అతడు మిగిలిన సీజన్‌కు అందుబాటులో ఉండటం లేదని ఆ జట్టు స్పష్టం చేసింది.

భారత్‌లో నిర్వహించిన టోర్నీలో పలువురు ఆటగాళ్లు కరోనా బారిన పడటంతో ఐపీఎల్‌ మే 4న అర్ధాంతరంగా నిలిచిపోయిన సంగతి తెలిసిందే. బీసీసీఐ, ఐపీఎల్‌ నిర్వాహకులు మిగతా సీజన్‌ను సెప్టెంబర్‌ 19 నుంచి యూఏఈలో తిరిగి నిర్వహించాలని చూస్తున్నారు. ఈ క్రమంలోనే ఇప్పటికే పలు జట్ల ఆటగాళ్లు అక్కడికి చేరుకొని ప్రాక్టీస్‌ మొదలుపెట్టారు. రాజస్థాన్‌ ఆటగాళ్లు కూడా త్వరలోనే అక్కడికి వెళ్లనున్నారు. ఇంతలోనే బట్లర్‌ దూరమయ్యాడని ఆ జట్టు ప్రకటించింది. ఇక ఈ సీజన్‌ మధ్యలో నిలిచిపోయేసరికి ఆ జట్టు ఏడు మ్యాచ్‌ల్లో మూడు విజయాలు, నాలుగు ఓటములతో ఐదో స్థానంలో నిలిచింది. ఇకపై మెరుగైన ప్రదర్శన చేస్తే ప్లేఆఫ్స్‌కు చేరుకునే అవకాశం లేకపోలేదు.