T20 World Cup: కోహ్లీ బ్యాటింగ్‌ చూసి వారిద్దరికీ మాటలు రాలేదు..

ఇంటర్నెట్‌డెస్క్‌: న్యూజిలాండ్‌తో తలపడే కీలక మ్యాచ్‌లో ఎలాగైనా గెలవాలనే పట్టుదలతో ఉన్న టీమ్ఇండియా నెట్స్‌లో బాగా కష్టపడుతోంది. ఈ మ్యాచ్‌లో భారత్‌ ఓడిపోతే సెమీస్‌ అవకాశాలు క్లిష్టమయ్యే పరిస్థితులు నెలకొన్నాయి. దీంతో ఆటగాళ్లంతా కసిగా సాధన చేస్తున్నారు. తాజాగా కెప్టెన్‌ విరాట్‌ కోహ్లీ నెట్స్‌లో సాధన చేస్తున్న వీడియోను ఐసీసీ ఇన్‌స్టాగ్రామ్‌లో అభిమానులతో పంచుకుంది. ఈ సందర్భంగా యువ ఆటగాళ్లు ఇషాన్‌ కిషన్‌, శ్రేయస్‌ అయ్యర్‌ తమ కెప్టెన్‌ ఎలా బ్యాటింగ్‌ ప్రాక్టీస్‌ చేస్తున్నాడో చూసి ఆశ్చర్యపోయారు. కోహ్లీ షాట్లు చూసి వారిద్దరికీ మాటలు రావడం లేదని ఆ పోస్టుకు వ్యాఖ్యానం జతచేసింది.

మరోవైపు పాకిస్థాన్‌తో జరిగిన తొలి మ్యాచ్‌లో బ్యాట్‌తో విఫలమైన హార్దిక్ పాండ్య బౌలింగ్‌ చేయలేని సంగతి తెలిసిందే. ఈ మ్యాచ్‌లో అతడు భుజం గాయంతో ఇబ్బంది పడగా రెండో ఇన్నింగ్స్‌లో మ్యాచ్‌లో పాల్గొనలేదు. అతడి స్థానంలో ఇషాన్‌ కిషన్‌ సబ్‌స్టిట్యూట్‌ ఫీల్డర్‌గా వచ్చాడు. ఈ క్రమంలోనే హార్దిక్‌ తుదిజట్టులో ఉండి బౌలింగ్‌ చేయకపోతే లాభమేంటని పలువురు క్రికెట్‌ విశ్లేషకులు సైతం పెదవి విరిచారు. దీంతో అతడు తాజాగా నెట్స్‌లో బౌలింగ్‌ చేస్తూ కనిపించాడు. ఈ వీడియోను కూడా ఐసీసీ ట్విటర్‌లో పంచుకుంది.