IND vs PAK: టీమ్‌ఇండియాతో ఫైనల్స్‌ కోసం ఎదురుచూస్తున్నాం: అక్తర్

ఇంటర్నెట్‌డెస్క్‌: టీమ్‌ఇండియాతో ఫైనల్స్‌ ఆడేందుకు ఎదురుచూస్తున్నట్లు పాకిస్థాన్‌ మాజీ పేసర్‌ షోయబ్‌ అక్తర్‌ అన్నాడు. అక్కడ కూడా మరోసారి కోహ్లీసేనను ఓడించాలని ఉందన్నాడు. అందుకోసం భారత్‌ ఫైనల్స్‌కు రావాలని కోరుకుంటున్నట్లు చెప్పాడు. అక్కడ టీమ్‌ఇండియా తమని ఓడించడానికి మరో మౌకా (అవకాశం) ఇవ్వాలని ఉందన్నాడు. తాజాగా తన యూట్యూబ్‌ వీడియోలో మాట్లాడిన అక్తర్‌.. భారత్‌ - పాకిస్థాన్‌ మ్యాచ్‌లకు సంబంధించిన ‘మౌకా’ ఆడ్వర్టైజ్‌మెంట్‌పై ఆగ్రహం వ్యక్తం చేశాడు.

2015 నుంచి ప్రపంచకప్‌ టోర్నీల్లో భారత్‌-పాకిస్థాన్‌ మ్యాచ్‌లకు సంబంధించి ‘మౌకా మౌకా’ పేరిట అడ్వర్టయిజ్‌మెంట్లు రూపొందించిన సంగతి తెలిసిందే. ప్రపంచకప్‌ టోర్నీల్లో ఇదివరకు దాయాది జట్టుపై భారత్‌ సంపూర్ణ ఆధిపత్యం చలాయించిన నేపథ్యంలో భారత్‌కు అనుకూలంగా పాక్‌కు వ్యంగ్యంగా ఆ అడ్వర్టయిజ్‌మెంట్లు ఉండేవి. అయితే, ఇప్పుడు జరుగుతున్న టీ20 ప్రపంచకప్‌లో టీమ్‌ఇండియా.. పాకిస్థాన్‌తో ఓడిన నేపథ్యంలో అక్తర్‌ ఆ యాడ్‌పై తనదైనశైలిలో స్పందించాడు.

‘మేం టీమ్‌ఇండియాతో ఫైనల్స్‌ కోసం ఎదురుచూస్తున్నాం. అక్కడ మరోసారి ఓడించాలని ఉంది. అది జరగాలని మేం కోరుకుంటున్నాం. ఫైనల్స్‌లో టీమ్‌ఇండియా మరో మౌకా (అవకాశం) ఇవ్వాలని చూస్తున్నాం. ఇక్కడ నేను ‘మౌకా’ అని పేర్కొనడానికి ఒక కారణం ఉంది. ఎందుకంటే ఆ పదం ఇప్పుడు పాకిస్థాన్‌ను అపహాస్యం చేసేది కాదు. మామూలుగా ఒక అడ్వర్టయిజ్‌మెంట్‌ రూపొందించడం, అది సరదాగా ఉండటం తప్పేం కాదు. కానీ, ఒక దేశాన్ని కించపరిచే విధంగా ఉండకూడదు. మాది గర్వకారణమైన దేశం. ఇకపై మౌకా అనే పదం ఏమాత్రం ఎంటర్‌టైన్మెంట్‌ కాదు’ అని అక్తర్‌ చెప్పుకొచ్చాడు.

అలాగే గతరాత్రి టీమ్‌ఇండియా.. అఫ్గానిస్థాన్‌పై గెలుపొందడంతో చాలా మంది పాక్‌ అభిమానులు ఈ మ్యాచ్‌ ఫిక్సింగ్‌ అయ్యిందని పేర్కొంటూ సామాజిక మాధ్యమాల్లో విరివిగా పోస్టులు పెడుతున్నారు. దీనిపై స్పందించిన అక్తర్‌.. ఇందులో అనవసరంగా అఫ్గానిస్థాన్‌ను నిందించరాదని కోరాడు. ఆదేశంలో ప్రస్తుత పరిస్థితులు దారుణంగా ఉన్నాయని, ఇలా వ్యాఖ్యానించడం పట్ల ఆ జట్టుకు ప్రమాదకరమని చెప్పుకొచ్చాడు. అఫ్గాన్‌ బలమైన జట్టు కాదని, ఈ మ్యాచ్‌లో బలమైన టీమ్‌ఇండియాతో పోటీపడిందని అభిప్రాయపడ్డాడు.

► Read latest Sports News and Telugu News

► Follow us on Facebook, Twitter, Instagram, Koo, ShareChat and Google News.

ఇవీ చదవండి

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.