IND vs SA: హోటల్‌ సిబ్బందితో టీమ్‌ఇండియా క్రికెటర్ల డాన్స్‌.. చూడండి

ఇంటర్నెట్‌డెస్క్‌: టీమ్‌ఇండియా దక్షిణాఫ్రికా పర్యటనలో తొలి మ్యాచ్‌తోనే చరిత్ర సృష్టించి ఆకట్టుకుంది. సెంచూరియన్‌ వేదికగా సూపర్‌ స్పోర్ట్‌ మైదానంలో జరిగిన మొదటి టెస్టులో కోహ్లీసేన 113 పరుగుల తేడాతో ఘన విజయం సాధించిన సంగతి తెలిసిందే. దీంతో ఈ మైదానంలో గెలుపొందిన తొలి ఆసియా జట్టుగా రికార్డులకెక్కింది. ఈ క్రమంలోనే టీమ్‌ఇండియా ఆటగాళ్లంతా ఆనందంలో మునిగితేలారు. మ్యాచ్‌ అనంతరం హోటల్‌కు చేరుకున్న వీరికి అక్కడి సిబ్బంది ఘన స్వాగతం పలికారు.

డాన్స్‌ చేస్తోన్న హోటల్‌ సిబ్బందిని చూసి భారత క్రికెటర్లు రవిచంద్రన్‌ అశ్విన్‌, మహ్మద్‌ సిరాజ్‌, ఛెతేశ్వర్‌ పుజారా సైతం స్టెప్పులేశారు. ఈ వీడియోను అశ్విన్‌ తన ఇన్‌స్టాలో అభిమానులతో పంచుకున్నాడు. మ్యాచ్‌ అనంతరం ఎప్పుడూ ఉండే ఫొటోలు బోర్‌ కొడతాయి. దీంతో ఈ సందర్భాన్ని మరింత మధుర జ్ఞాపకంగా మిగిల్చేందుకు పుజారా.. తొలిసారి సిరాజ్‌తో కలిసి స్టెప్పులేశాడు. ఇదో గొప్ప విజయం’ అంటూ అశ్విన్‌ ఆ వీడియోను పంచుకున్నాడు.