Harmanpreet kaur: అందుకే మైదానంలో వెనక్కి తగ్గను: హర్మన్‌ప్రీత్‌ కౌర్‌

దిల్లీ: రానున్న టీ20 ప్రపంచకప్‌ 2023(T20 World cup 2023) ముంగిట ఆస్ట్రేలియా(Australia)తో జరగనున్న 5 మ్యాచ్‌ల టీ20 సిరీస్‌(T20 series)కు భారత అమ్మాయిలు సిద్ధమయ్యారు. ముంబయి వేదికగా డిసెంబర్‌ 9న ఆసీస్‌ జట్టును టీమ్‌ఇండియా ఢీకొనబోతుంది. ఈ నేపథ్యంలో కెప్టెన్‌ హర్మన్‌ ప్రీత్‌ కౌర్‌(Harmanpreet kaur) మాట్లాడుతూ తమ విజయాల వెనుక ఉన్న ఆసక్తికర విషయాలను పంచుకొంది. 

‘‘జట్టులో కొందరు తమకు తాముగా గొప్ప ప్రదర్శన చేసేవారుంటారు. మరికొందరికి మాత్రం మన ప్రోత్సాహం అవసరం ఉంటుంది. వారిని కూడా అందరితో సమానంగానే చూడాల్సివుంటుంది. అన్నింటికన్నా ముఖ్యమైనది.. జట్టు సభ్యులకు నా శక్తి సామర్థ్యాలపై పూర్తి నమ్మకం ఉంది. అందుకే ఫీల్డ్‌లో ఉన్న సమయంలో నాకు ఎక్కడా వెనక్కి తగ్గే అవసరం రాదు. ప్రతి టోర్నమెంట్లోనూ మేం మెరుగైన ప్రదర్శన ఇవ్వడానికి ఇది మాకు తోడ్పడుతోంది. నాతో ఏ విషయాన్నైనా సంకోచం లేకుండా పంచుకుంటారు. కాబట్టే నేను జట్టును సమర్థంగా నడిపించగలుగుతున్నాను. వారు చెప్పకపోతే ఆ సమస్య అలాగే ఉండిపోతుంది. నాకు తెలిసినంతవరకు జట్టును కలిసి కట్టుగా ఉంచడంలోనే విజయ రహస్యం దాగివుంది’’ అంటూ హర్మన్‌ ప్రీత్‌ వెల్లడించింది.