Sania Mirza: అమెరికన్ షో.. సెరెనాపై ప్రశ్నకు వింతైన ఆప్షన్లు.. స్పందించిన సానియా

ఇంటర్నెట్ డెస్క్‌: తెలుగులో ‘మీలో ఎవరుకోటీశ్వరుడు?’.. హిందీలో ‘కౌన్‌ బనేగా కరోడ్‌పతి’ ఫేమస్‌ టెలివిజన్ షోలు.. హోస్ట్‌లు ప్రశ్నలు అడగటం.. పోటీకి వచ్చినవారు కరెక్ట్‌ సమాధానాలు చెప్పి ప్రైజ్‌మనీని గెలుచుకోవడం సర్వసాధారణం. అమెరికాలో ‘హూ వాంట్‌ టు బి ఏ మిలియనీర్?’ షో ఎంతో పాపులర్. అయితే పోటీకి వచ్చిన ఓ కంటెస్ట్‌కి షో నిర్వాహకులు ఆన్‌లైన్‌లో ప్రశ్నను సంధించారు. అప్పటి వరకు బానే ఉంది. కానీ హోస్ట్ ఇచ్చిన నాలుగు ఐచ్ఛికాలే సోషల్‌ మీడియాలో ట్రోలింగ్‌కు గురి చేసింది. ఇంతకీ ఏం జరిగిందంటే..? 

అమెరికన్‌ షోలో కంటెస్ట్‌కి ఇచ్చిన ప్రశ్న.. ‘‘ఈ క్రింది టెన్నిస్‌ దిగ్గజాల్లో ఎనిమిది వారాల గర్భంతో ఆస్ట్రేలియన్‌ ఓపెన్‌ను గెలిచింది ఎవరు..?’’.. దానికి నాలుగు ఆప్షన్లు ఇచ్చారు. ఆండీ ముర్రే, సెరెనా విలియమ్స్, రోజర్ ఫెదరర్‌, జాన్‌ ఎన్రో అంటూ ఐచ్ఛికాలను ఇచ్చారు. ఇక్కడే అసలైన తమాషా.. ఎందుకంటే సెరెనా విలియమ్స్‌ కాకుండా మిగతా ముగ్గురు పురుష ఆటగాళ్లు కావడం విశేషం. అయితే ఇది గతేడాది షో సందర్భంగా జరిగిందని పలువురు కామెంట్లు పెట్టారు. అయితే ఇప్పుడు తాజాగా భారత టెన్నిస్‌ దిగ్గజం సానియా మీర్జా స్పందించడంతో మరోసారి ట్రోలింగ్‌ జరిగింది. ‘‘చాలా కష్టమైన ప్రశ్న’ అంటూ సానియా ట్వీట్‌ చేసింది. అయితే అది స్క్రీన్‌షాట్‌ తీసి పెట్టారని కొందరు కామెంట్‌ చేస్తుండగా.. మరికొందరేమో ఇలాంటి వాటికి సమాధానం చెప్పడం కష్టమేనంటూ ఆటపట్టించారు. అయితే ఆ ఫొటోను మార్ఫింగ్‌ చేసి సోషల్‌ మీడియాలో పెట్టినట్లు కూడా కామెంట్లు వస్తున్నాయి. అయితే ఆ ప్రశ్నకు సరైన సమాధానం మాత్రం సెరెనా విలియమ్స్. ఆమె 2017 ఆస్ట్రేలియన్‌ ఓపెన్‌ను సొంతం చేసుకొంది. అప్పుడు సెరెనా 8 వారాల గర్భవతి.